Durante e marchanan di karnaval, Direktorado di Supervishon i Mantenshon di Lei a tene diferente kontròl na e stèntnan di kuminda, gruponan di karnaval i tambe establesimentunan di hóreka riba e ruta. E kontròlnan akí ta parti di e supervishon regular pa loke ta trata siguridat di kuminda i siguridat kontra kandela durante kualke evento.
E inspektornan di Direktorado di Supervishon i Mantenshon di Lei a tene en total trintishete kontròl. E kontròlnan a tuma lugá na ocho sitio riba ruta di e marchanan di karnaval: Van den Tweel, Rotònde Sabana, Kaya Betico Croes, Brion Kazèrne, Skina Kayente, Kaya Simon Bolivar, Kaya Caracas i Kaya Nikiboko Sùit.
A konstatá dos iregularidat
E inspektornan a konstatá dos iregularidat:
Na un stènt na Rotònde Sabana e empakenan tabata pafó di e ekipo pa fría.
Na un stènt riba Kaya Nikiboko Sùit no tabatin un aparato pa paga kandela.
Mesora a hala atenshon di e empresarionan i nan a haña splikashon tokante nan responsabilidat.
Informashon klaro adelantá
A tene un anochi di informashon i tambe a bishitá radio adelantá pa duna informashon tokante e reglanan di higiena i siguridat di kuminda. A dediká atenshon èkstra na wardamentu i preparashon di kuminda na un manera adekuá. Pensa riba e temperatura korekto, traha limpi, evitá kontaminashon krusá, higiena personal i siguridat kontra kandela.
Direktorado di Supervishon i Mantenshon di Lei ta mira ku mayoria empresario a kumpli ku e reglanan. Kontròl i bon informashon ta keda importante pa laga tur evento na Boneiru kana na un manera seif i higiéniko.
