Biblioteka Públiko Boneiru ta pará dilanti di un paso importante: den luna di mart 2025 biblioteka ta muda pa un edifisio nobo na Kaya Amsterdam. Esaki ta e ubikashon wardando riba e lokalidat definitivo den sentro di siudat. E mudansa ta eksigí pa e biblioteka aktual sera temporalmente. Esaki ta nesesario pa por hiba tur material i fasilidat na e lokalidat nobo. For di 10 di febrüari te 5 di mart e servisionan di biblioteka, manera fiamentu di buki físiko i uso di kòmpiuter, lo no ta disponibel.
Aspirashon di e empleadonan di biblioteka ta pa sostené e miembronan mas mihó posibel den e situashon temporal akí. Pa duna e miembronan sufisiente tempu pa entregá nan materialnan, ta prolongá e término di fiamentu te despues ku biblioteka habri su portanan atrobe. Tambe a oumentá e kantidat di buki ku por fia di 5 pa 8 buki pa kada biaha. Durante e periodo ku biblioteka ta será, miembronan eksistente por haña akseso sí na e kolekshon online (e-books) i otro fuentenan digital via e portal di biblioteka. Pa motibu di e mudansa biblioteka no ta alkansabel via telefòn den e periodo di 10 di febrüari te 5 di mart, pero e tim di biblioteka ta keda disponibel pa preguntanan urgente via email (info@bibliotheekbonaire.com). Tambe miembronan i bishitantenan por tene e wèpsait (www.bibliotheekbonaire.com) i nos medionan sosial na bista pa aktualisashon.
Dikon e mudansa?
E mudansa pa Kaya Amsterdam ta ofresé biblioteka e oportunidat pa renobá i mehorá su servisionan. E edifisio nobo ta mas grandi i mihó aksesibel, loke ta brinda espasio pa un kolekshon mas amplio, fasilidatnan mas moderno i mas posibilidat pa interakshon i eventonan komunitario. Esaki ta hasi posibel pa biblioteka sigui fortifiká su ròl komo sentro edukativo, sosial i kultural na Boneiru. “Nos ta komprendé ku e seramentu temporal por kousa inkumbiniensia, pero nos ta kombensí ku e lokalidat nobo lo benefisiá biblioteka i ku e transformashon lo mehorá eksperensia di nos miembronan i bishitantenan”, segun e hefe di departamento Jennifer Pocornie-Martis. Despues di e mudansa e miembronan i bishitantenan lo tin akseso na e fasilidatnan nobo i amplio, entre otro un espasio mas grandi pa lesa, posibilidat digital pa siña, un ‘makerspace’ kreativo, aksesibilidat mehorá pa e kolekshon di buki i un oferta mas amplio di tayer i aktividat kultural.
