E grupo di trabou den kua tin representashon di Gabinete di Gezaghèber, Supervishon i Mantenshon di Lei, Ofisina di diputado Kroon, Ofisina di diputado Thielman, Kuerpo di Polis Hulanda Karibense, Ministerio Públiko i departamento di Komunikashon ta bai atendé den fase ku e problemátika di kachó.
E problema ta kompleho i ta enserá mas ku solamente molèster di kachó ku ta kana lòs. Tin kestion di un oumento di e kantidat di insidente ku mordementu, kaminda no solamente hende na pia i mucha ku ta kore baiskel ta bira víktima di esaki, pero tambe hopi kriadó di kabritu i karné. Tin kestion di maltrato di bestia, entre otro deskuido. Tin un oumento di krio di diferente tipo di kachó kaminda no ta ofresé bon sirkunstansia na e mama kachó i su yunan i kaminda no ta proveé e kuido i sosialisashon nesesario. Banda di esei tin doño di kachó, ku sí ke kuida nan bestia di kas, pero finansieramente nan no por hasi esaki.
Gobièrnu por hasi uso di tres instrumento. Mantenshon di lei, sòru pa fasilidat i duna informashon. Pa hisa tantu e problemátika di kachó komo bienestar di bestia na un otro nivel, e grupo di trabou a skohe pa un aserkamentu riba término kòrtiku i mediano, kaminda ta hasi uso di tur e intrumentonan ku gobièrnu tin.
Mantenshon di lei
Bou di e denominashon mantenshon di lei, e atenshon ta riba redukshon di insidente ku mordementu i stimulashon di ta un bon doño di kachó, pa medio di mantené lei riba kachó ku ta kana lòs sin supervishon. Ku e ordenansa di kachó aktual e posibilidatnan pa mantenshon di lei ta limitá na duna but, señalá un kachó komo peligroso i laga kachó drumi. Riba término kòrtiku esaki ta nifiká ku awor akí tambe lo hasi uso di e posibilidat di duna but den kasonan kaminda un doño ta laga su kachó kana lòs sin supervishon. Banda di esaki ta trahando tambe riba aktualisashon di lei, di manera ku por atendé den un forma mas mihó ku e problema akí.
Gezaghèber Edison Rijna: ‘Un di mi responsabilidatnan ta sòru pa òrden públiko i siguridat. Pa motibu di insidentenan serio ku mordementu ku regularidat esaki ta na diskushon. Triángulo (gezaghèber, ministerio públiko i polis) a deliberá pa yega na un aserkamentu bon pensá. Ta nos tarea pa aktua na momentu ku tin ekseso, pero tòg mi ke hala atenshon di doñonan di kachó. Un doño di kachó ta responsabel pa komportashon di su kachó. Tin sufisiente posibilidat na nos isla pa sòru pa un kachó bira un animal sosial. Den e periodo binidero nos ta bai supervisá mas severo riba siguridat rònt di problemátika di kachó i den kolaborashon ku polis nos lo mantené lei riba esaki tambe.’
Fasilidat i informashon
E kampaña di informashon ta ranka sali ku dunamentu di informashon básiko. Ora bo tin un kachó, kiko esaki ta enserá pa loke ta trata kuido. For di alimento te kuido te sòru pa fasilidat, manera e programa di sterilisashon ku ya kaba ta eksistí pa doñonan di kachó ku no ta finansieramente fuerte. Pero tambe durante e kampaña hasi uso di material ku ta oumentá bienestar di kachó, manera trahamentu di un kas di kachó òf pone un banchi disponibel. Den e lunanan binidero na vários manera nos lo duna atenshon na bienestar di bestia.
Diputadonan Kroon i Thielman: ‘Nos ta solushoná e problema akí ku informashon? Nò, esaki lo no ta e kaso. Pa enfrentá e problemá kompleho akí, mantenshon di lei, sòru pa fasilidat i duna informashon ta nesesario. Informashon ta basá riba konsientisashon i esaki ta prinsipalmente un kestion di término largu. Nos tur huntu komo komunidat mester realisá ku no tur ora nos ta anda mes bon ku nos bestianan di kas. Akí nos no ta bisa ku nos ta bai determiná kon esaki tin ku bai eksaktamente, pero nos por yuda i duna informashon si kiko ta e mihó manera pa e doño kumpli ku e kuido nesesario di su kachó. Den e tempu binidero ku regularidat nos ta bai pidi atenshon pa esaki i gustosamente nos ta drenta e kombèrsashon ei ku bo.’
For di luna di novèmber por sigui e kampaña via wèpsait i Facebook di Gobièrnu di Boneiru.
