Durante un reunion spesial di Konseho Insular dia 14 di ougùstùs 2025, sr Anthony Weber di Frakshon M21 i sr Peter Silberie di Frakshon Vrolijk, a huramentá ofishalmente komo diputado pa Boneiru. Ku nombramentu di e diputadonan nobo, Kolegio Ehekutivo ta kompletu atrobe i e supstitushon (indeplaatstreding) di parti di gezaghèber ta terminá.
Ku retiro di dos diputado dia 26 di ougùstùs 2025, konforme artíkulo 54 insiso 2 di Lei Entidatnan Públiko BES (WolBES), gezaghèber a supstituí Kolegio Ehekutivo. E supstitushon akí ta reglá den lei pa garantisá kontinuidat di gobernashon. Den e simannan tras di lomba, gezaghèber ku sosten di e diputado ku tabata den funshon ainda i e sekretario insular, a kumpli ku e tareanan di Kolegio Ehekutivo. Den e periodo akí gezaghèber a tuma desishonnan pa loke ta trata ‘filenan’ di maneho, kaminda no tabata pèrmití pa surgi retraso.
Ku huramentashon di dos diputado nobo pa Boneiru, Weber i Selberie, e supstitushon di gezaghèber ta terminá. Kolegio Ehekutivo ta konsistí atrobe di tres diputado insular i un gezaghèber. Gezaghèber ta traspasá e responsabilidat pa gobernashon di nos isla pa e Kolegio Ehekutivo kompletu atrobe.
Repartishon di kartera:
Dia 15 di ougùstùs, durante e promé reunion di e Kolegio Ehekutivo nobo, e miembronan a palabrá un repartishon di kartera.
E repartishon di kartera di Kolegio Ehekutivo ta komo lo siguiente:
Diputado Anthony Weber Ta duna guia na: Direktorado di Maneho i Sosten
Responsabel pa áreanan di maneho manera:
- Finansa di gobièrnu i Impuesto
- Asuntunan Intergubernamental i Regional
- Bienestar di animal
- Ekonomia, Empresariado i Turismo Sostenibel
Diputado Peter Silberie Ta duna guia na: Direktorado di Komunidat i Kuido
Responsabel pa áreanan di maneho manera:
- Edukashon di Alohamentu di Enseñansa
- Deporte i Rekreashon
- Arte i Kultura
- Salubridat Públiko
Diputado Clark Abraham Ta duna guia na: Direktorado di Planifikashon i Desaroyo; Direktorado di Supervishon i Mantenshon di Lei Responsabel pa áreanan di maneho manera:
- Ordenamentu Teritorial, Planifikashon i Kalidat di Konstrukshon
- Infrastruktura i Maneho di Awa
- Asuntunan Agríkola, Piskamentu i Siguridat di Kuminda
- Naturalesa, Medio Ambiente i Rekuperashon Ekológiko
Gezaghèber Soliano ta presidente di Konseho Insular, presidente di Kolegio Ehekutivo i presidente di Reunion General di Akshonista.
Responsabel pa áreanan di maneho manera:
- Bon gobernashon
- Órden Públiko i Siguridat
- Maneho di Krísis
Despues di e huramentashon ofisial, den presensia di nan famianan i hopi invitado, ámbos diputado nobo a ekspresá nan gratitut i nan ambishonnan.
Dhr. Weber: “Mi ta kla pa traha pa boso i tambe huntu ku boso. Pueblo di Boneiru, masha danki, ta un gran honor pa ta boso diputado.”
Dhr. Silberie: “Mi ta primintí ku den e temporada kòrtiku akí nos lo hasi nos máksimo esfuerso, konhuntamente ku henter Konseho Insular pa nos traha pa Boneiru.”
Konseho Insular a ekspresá su apresio pa e diputadonan nobo i a deseá nan hopi éksito den e periodo binidero. Pa un bista general kompleto di tur e áreanan di maneho i responsabilidatnan, bo por klek aki.
