Un logro spesial pa Edsel Cecilia, kende a selebrá su di 20 aniversario na Entidat Públiko Boneiru. Den presensia di su famia, su koleganan i su amigunan, a para ketu na dos dékada di kompromiso, enbolbimentu i dedikashon na e organisashon i na komunidat di Boneiru.
Durante e enkuentro e direktor interino Gino Leito i Karinka Wijnhoven a dirigí nan mes ku bunita palabranan di apresio na Edsel. Nan a para ketu na su kompromiso di hopi aña largu, su profeshonalidat i e aporte balioso ku durante e binti añanan tras di lomba el a duna na Entidat Públiko Boneiru.
Banda di su karera komo empleado públiko, Edsel a desempeñá un ròl komo mandatario tambe. For di ougùstùs 2017 te ku ougùstùs 2019, durante un periodo di 20 luna, e tabata diputado pa e área sosial di Boneiru. Den e funshon akí tambe ku hopi dedikashon el a traha duru pa desaroyo di Boneiru i pa bienestar di Boneiru su habitantenan.
Entidat Públiko Boneiru ta felisitá Edsel kordialmente ku e logro spesial akí i ta gradisié pa su dedikashon i enbolbimentu durante tur e añanan akí, tantu komo empleado i durante su periodo komo diputado. Nos ta deseá Edsel hopi aña plasentero, salú i eksitoso mas den nos organisashon.
