Habri un bar

Bo ke habri un bar na Boneiru? E ora ei bo tin ku sigui diferente paso i pidi diferente pèrmit. Riba e página akí bo ta lesa kua ta e pèrmitnan ku bo tin mester i kon bo ta hasi petishon pa esakinan.

Kiko e produkto òf servisio aki ta nifiká?

Kiko bo mester tene bon kuenta kuné?

Bo no tin mag di simplemente habri un bar.
Pa bende alkohòl bo tin mester di un pèrmit promé.
Sin pèrmit bo no tin mag di bende alkohòl. Esaki por kondusí na un but òf seramentu di bo bar.

Sòru tambe pa bo Deklarashon Tokante Kondukta (Verklaring Omtrent het Gedrag – VOG) no ta mas bieu ku tres luna na momentu di pidi e pèrmit.

Un bar ta un empresa di hóreka, kaminda bo ta bende bibida ku bo klientenan. Ta trata di:

benta di bibida stèrki, pa uso den bar òf pa bai kuné
benta di bibida ku tiki alkohòl i bibida ku no ta kontené alkohòl
benta di eis òf produktonan komparabel pa uso na e sitio mes

Pa por hasi esaki, bo tin mester di un pèrmit pa bibida i hóreka.

Ki ora bo por pidi esaki?

Bo por habri un bar ora:

bo tin un pèrmit di establesimentu;
bo pidi i haña un pèrmit pa bibida i hóreka;
bo VOG no ta mas bieu ku tres luna;
e lokalidat ta adekuá pa un bar;
bo ta kumpli ku e reglanan relashoná ku tenementu di e bar limpi, siguridat i òrden públiko.

Si un di e instansianan enbolbí duna un konseho negativo, por nenga e pèrmit.

Kon bo por pidi esaki?

Asina’ki bo ta habri un bar na Boneiru:

Lanta bo empresa (via un notario, ku eksepshon di un empresa unipersonal – eenmanszaak / EZ).
Inskribí bo empresa na Kámara di Komèrsio Boneiru.
Hasi petishon pa un pèrmit di establesimentu na Direktorado di Planifikashon i Desaroyo (R&O), departamento di Realisashon.
Despues di risibí e pèrmit di establesimentu, bo ta hasi petishon pa un pèrmit pa bibida i hóreka.
Nan ta evaluá bo petishon. Den esaki nan ta pidi konseho di polis, kuerpo di bombero i Direktorado di Supervishon i Mantenshon di Lei.
Bo ta risibí un mensahe ku bo ta haña e pèrmit.

Ku ken bo por tuma kontakto?

Direktorado di Planifikashon i Desaroyo (R&O)
Adrès: Kaya Grandi 56-58
Telefòn: (+599) 715 5330
E-mail: directie_ro@bonairegov.com

Orario di servisio
Djaluna te ku djabièrnè: 8:00 - 16:00 or

Kuantu tempu e ta tuma?

Ta trata e pèrmit di establesimentu dentro di 8 siman.
Den kaso ku no tuma un desishon dentro di e término akí, e ora ei ta posibel ku a otorgá e pèrmit konforme derecho.

E tempu di tratamentu di e pèrmit di bibida i hóreka ta dependé di e konsehonan di e instansianan enbolbí.

Kuantu e ta kosta?

E gastunan pa habri un bar ta dependé di e pèrmitnan ku bo ta pidi.

Bo no ta di akuerdo ku e desishon?

Bo no ta di akuerdo ku un desishon?
E ora ei bo por hasi opheshon. Den e karta ku e desishon tin pará kon bo mester hasi opheshon i dentro di kua término.

Kiko nos ta hasi ku bo datonan personal?

Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.

Den e Lei Protekshon di dato personal BES tin skirbí kon Entidat Públiko Boneiru mester hasi esaki.

E reglanan mas prinsipal ta :

Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
Nan ta registrá i prosesá bo datonan di forma seif, konfidenshal i kouteloso.
Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
No ta warda bo datonan mas largu di loke ta nesesario pa e petishon òf loke bo a mèldu.
Otro organisashon ta haña bo datonan solamente si esei mester segun lei.
Bo por puntra pa kua fin ta usa bo datonan i kiko ta hasi ku nan.