Turismo
Introdukshon
E promé turistanan a yega Boneiru dia 20 mei 1922. Tabata papia den e tempu ei di ekskurshonista. Dos bapor di KNSM (Koninklijke Nederlandse Stoomboot Maatschappij), Baralt i Mérida, a trese 365 eskurshonista Boneiru. Komo ku no tabatin ainda hotèl partikular na unda nan por a keda, habitantenan di Boneiru a habri porta di nan kas pa duna akomodashon na e promé bishitantenan aki. Pokopoko residentenan di Kòrsou i Aruba a kuminsá konosé Boneiru komo un destinashon turístiko.
Aviashon
Boneiru a bira mas konosí na momentu ku e promé oroplanu, nòmber popular pa avion den e tempu ei, a aterisá na Boneiru. Esaki a sosodé dia 9 di mei 1936 i tabata e oroplano Oriol di KLM West Indisch Bedrijf. E promé buelo ofisial tabata ku e avion Snip na fin di e luna ei. E pista di aterisahe tabata situá na Subí Blanku. Den kuminsamentu tabata un buelo pa siman. Na 1942 a bai na dos buelo semanal. Komo ku e pista tabata di tera, tabata surgi problema spesialmente durante temporada di yobida. Na 1944 a kuminsá traha un pista di asfalt (mil meter) sùit di Kralendijk, pegá ku plantashi Lima. E aeropuerto a haña nòmber di Flamingo Vliegveld. Na yüni 1976 a habri un terminal nobo: Flamingo International Airport. Tambe a ekspandé e pista tantu na largura komo na hanchura na diferente okashon. Operashon di aeropuerto di Boneiru ta bou di maneho di BIA - Bonaire International Airport. Avionnan di entre otro KLM, TUI, Delta, American, Dividivi Airlines, EZ-Air ta karanan konosí na Boneiru su aeropuerto. Anteriormente tambe Antilliaanse Luchtvaart Maatschappij (ALM) ku a surgi for di KLM West Indisch Bedrijf na 1964, BonaireExel i despues DAE, Air Aruba, Tiara i Inselair.
Turismo krusero
Turismo di Boneiru a sigui krese. Meimei di añanan sesenta gobernantenan di e isla a kuminsá pensa pa atraé barkunan krusero. Na novèmber1968 e promé barku di turista, Bergensfjord, a mara na loke aktualmente ta Waf Fransisco (Chico) Mercelina. Despues a sigui mas barku di e kompania Norwegian American Line, manera Sagafjord i Vistafjord.
Segun añanan tabata pasa, barkunan di mas kompania a kuminsá bishitá Boneiru. For di fin di añanan sesenta kaba Gobièrnu di Boneiru a sinti nesesidat pa traha un waf nobo. E úniko waf ku tabatin dilanti Plasa Wilhelmina, a kuminsá bira chikitu pa por a atendé barkunan ku tabata bini e isla aki.
E kontratista ENECA, un kompania italiano, a haña enkargo pa traha un waf nobo, ku a bin haña tambe despues (no ofisial) e nòmbernan Waf Nobo òf Waf di ENECA. Despues tabata papia di Zuidpier. Na 2019 e waf aki a haña nòmber di Nello Craane, un kapitan boneriano ku a pèrdè su bida trágikamente den laman banda di Cuba.
Akomodashon
Promé hotèl na Boneiru tabata Pasanggrahan. E palabra indones aki ta para pa un edifisio ku gobièrnu tabata usa pa akomodashon temporal di ámtenarnan di biahe. Si sobra lugá, por a risibí ekskurshonista/turista tambe.
Gobernador Oscar Helfrich na aprel 1920 a kumpra kas di Cornelis Raven Debrot i a habri Pasanggrahan. Helfrich mes a hospedá den mesun aña ei na Pasanggrahan.
Segundo Guera Mundial a trese hopi hende Boneiru, pa motibu di un kampamentu militar merikano i un sentro na unda a interná aleman i hendenan konsiderá komo peligroso pa estado. Asina mas hende a bin konosé e atrakshonnan di e isla.
Na 1947 a lanta 'Vereniging tot bevordering van het Toerisme'. E entidat aki a habri Hotel Central, pero el a sera mesun aña. Na 1951 a lanta N.V. Hotel Zeebad ku a habri Hotel Zeebad na 1952. Inisiativa di Lodewijk D. Gerharts, komersiante.
Boneiru a konosé diferente penshon: Penshon Hellmund, Penshon Rijna, Penshon Goede Hoop (Rincon), Jos Guesthouse, Hotel Rochaline.
Pero e hotèl ku a habri e era moderno di turismo na Boneiru tabata Hotel Bonaire na 1963. Loke a hasi posibel pa un hotèl segun konsepto moderno habri tabata e echo ku Boneiru den e aña ei a haña un planta nobo di koriente.
Algun aña despues (1967/1968) Adhemar Hart, un médiko boneriano, a konstruí Hotel Debonair na Hato. Su idea tabata pa krea un proyekto di bùngalo similar na esnan na Sur-Oropa. Hotel Debonair a frakasá komo empresa, pero na e sitio aki a desaroyá despues un kompleho turístiko grandi i eksitoso: Hotel Aquabitat, despues Captain Don's Habitat, na nòmber di Don Steward, pionero di turismo di buseo na Boneiru.
Zeebad despues a bira Flamingo Beach Club, Flamingo Beach Hotel i a desaroyá i bira loke awendia ta Divi Flamingo.
Dékadanan setenta, ochenta i mas despues hopi mas hotèl, resòrt, kondominio etc. a bini aserka. Sand Dollar Condominium su konstrukshon a tuma lugá meimei di dékada ochenta. A bini Harbourvillage na Playa Lechi, Lions Dive Hotel, Hamlet.
Tin proyekto turístiko ku no a bai bon. Por ehèmpel Hotel Sorobon, e promé proyekto turístiko grandi despues ku a konstruí Hotel Bonaire. Na desèmber 1965, durante un konferensia di prensa den “Orange Room” di Hotel Curacao Intercontinental, a presentá e proyekto aki. Nunka Hotel Sorobon no a keda kla. Algu mas ku 30 aña despues a basha e konstrukshonnan ku a keda na mitar abou.
Sorobon sinembargo despues tòg a bira un área di hotèl i apartamentu, tantu riba e península mes komo parti pabou. Por ehèmpel e promé hotèl pa naturista (nudista). Sorobon a bira despues un sentro di deporte di 'windsurfing', ku a kombertí un atrakshon turístiko, konosí pa su 'Children of the Wind', nòmber di un dokumental ku ta etalá prestashon di un grupo di mucha boneriano den e deporte i ku bou di guia di Elvis Martinus a haña fama mundial.
Un otro hotèl ku a frakasá tabata Flamingo Paradise, finansiá pa Banco de Trabajadores de Venezuela, proyektá pa bini riba e tereno pa nort di Aeropuerto Flamingo. Presensia sinembargo di e kanalnan diseñá pa arkitekto Daniel Camejo pa Flamingo Paradise, tambe e edifisionan mitar konstruí ku a keda tras, a sirbi pa konstruí diferente hotèl i proyekto di akomodashon, manera Plasa Resort Bonaire, komo esun mas importante den e aña.
Na Punt Vierkant tambe tin un proyekto grandi, Esmeralda, ku a frakasá, pero aki tambe despues a bini diferente proyekto turístiko eksitoso, manera Delfins Beach Resort Bonaire, Ocean Oasis Beach Club i diferente mas.
Na 1956 TERNA (Technisch-economische Raad der Nederlandse Antillen a traha un plan di desaroyo pa Boneiru. Outor dr. ir. Henriquez a mira turismo komo e fuente di entrada mas importante di desaroyo pa e isla. Un plan vishonario. Loke el a pensa a bira realidat.
