For di 1 di yüni 2022 no ta pèrmití mas pa bende saku, richi, kos pa drai bibida kuné i kuchú, kuchara i fòrki di plèstik desechabel mas. No tin mag di duna nan grátis tampoko. For di 1 di ougùstùs 2022 esaki ta konta tambe pa baki di kuminda di fom (stirofom).
Dia 7 di febrüari Entidat Públiko Boneiru a organisá un webinar informativo pa empresario tokante e prohibishon di plèstik desechabel. A invitá negoshinan ku ta bende plèstik desechabel tambe via email i a hasi un yamada tambe via medionan sosial. Durante e webinar akí a papia tokante importansia di e prohibishon, kon e prohibishon a bini na vigor i kon e reglanan nobo ta. Despues di e parti informativo e partisipantenan a haña oportunidat pa hasi pregunta i bai den diálogo ku Entidat Públiko Boneiru.
Por mira e webinar bèk riba nos kanal di Youtube (openbaar lichaam Bonaire) i nos página di Facebook (@openbaarlichaamBonaire).
Entidat Públiko Boneiru ta haña importante ku tur habitante ta na altura di e prohibishon akí. Huntu nos ta sòru pa un Boneiru liber di plèstik.
