Ku satisfakshon Entidat Públiko Boneiru ta wak bèk riba tres eksitoso enkuentro di partisipashon ‘Papia ku Pueblo’ ku resientemente a tuma lugá dia 22 di mart, 7 di aprel i 8 di aprel 2025. E enkuentronan akí tabata den signo di e Trayekto di Intensivashon di Maneho, un trayekto kaminda gobièrnu hulandes a otorgá 5,5 mion euro pa Boneiru pa e periodo 2025 – 2029. E meta ta pa sostené proyektonan di maneho ku ta kontribuí na oumento di konsientisashon tokante pasado di sklabitut i fortifikashon di Boneiru su identidat kultural.
Durante e enkuentronan a papia ku nos komunidat lokal tokante diferente proyekto ku ta fortifiká konsientisashon tokante pasado di sklabitut i kultura di Boneiru, manera lantamentu di un sentro di patrimonio, desaroyo di un método nobo di enseñansa ‘Hulandes komo idioma stranhero’, i digitalisashon i aksesibilidat di archivo. E kòmbersashonnan tabata habrí i konstruktivo, kaminda e partisipantenan a kompartí nan opinionnan, nan ideanan i nan preokupashonnan tokante kon e proyektonan akí por kontribuí mas mihó na un mihó futuro pa Boneiru.
Apresio pa enbolbimentu aktivo
En total mas òf ménos 80 partisipante a ekspresá nan mes tokante ehekushon di e proyektonan. Nan a papia entre otro tokante importansia di un sentro di patrimonio, konservashon di storianan i konosementu di ántes i nòmber di antepasadonan ku a biba den pasado di sklabitut, i tokante kon por protehá patrimonio di nos isla tantu lokalmente komo regionalmente. E partisipantenan a duna aporte balioso tokante kon e proyektonan akí por kontribuí na nan bida diario, na futuro di nos hóbennan i na fortifikashon di nos komunidat.
Proyektonan pa fortifikashon di maneho
E Trayekto di Intensivashon di Maneho ta enserá vários inisiativa, entre otro:
1. Sentro di Patrimonio i Museo: Un sitio sentral pa kolekshoná i kompartí kultura i historia di Boneiru.
2. Método di enseñansa Hulandes komo Idioma Stranhero: Un método di lès ku ta konektá mihó ku e ambiente sosial ku nos muchanan boneriano ta lanta aden.
3. Fortifikashon di Kadena Kultural: Fortifikashon di por ehèmpel Plataforma NGO, di manera ku organisashonnan kultural por haña i fortifiká otro i traha huntu ku otro.
4. Liña di tempu di Boneiru: Kolekshonamentu di susesonan, personanan i tradishonnan importante for di den historia di Boneiru, di manera ku por desaroyá un kánòn lokal ku e museonan i enseñansa por usa.
5. Digitalisashon di Archivo: Digitalisashon di dokumentunan i potrètnan históriko etc. pa hasi nan aksesibel pa tur hende. Esaki ta tuma forma di un kolaborashon konhunto entre Archivo Entidat Públiko Boneiru i FuHiKuBo.
6. Monumentu di nòmber i investigashon di nòmber: Lanta un monumentu pa rekordá hendenan ku bou di sklabitut nan a pone traha obligatoriamente na Boneiru i determinashon di nan nòmbernan di famia (fam).
7. Aporte Archivo Nashonal Kòrsou: Digitalisashon di dokumentunan históriko di Boneiru ku aktualmente ta na Kòrsou.
8. Interkambio di patrimonio: Kompartí patrimonio i ekspertisio kultural entre e islanan den área karibense.
E siguiente pasonan
Aporte di nos komunidat ta keda esensial pa éksito di e inisiativanan akí. Entidat Públiko Boneiru ta enkurashá tur hende pa keda aktivamente enbolbí i pa kompartí nan ideanan. Basá riba fitbèk di nos komunidat i toma di desishon interno (Kolegio Ehekutivo i Konseho Insular), Entidat Públiko Boneiru lo stipulá prioridat i disidí kua ta e proyektonan ku finalmente nan lo inkluí den e agènda di akshon. Naturalmente lo informá siudadanonan mas aleu tokante esaki.
Informashon di kontakto
Pa mas informashon tokante e agènda di akshon òf futuro enkuentronan tokante pasado di sklabitut, bo por tuma kontakto ku e Kwartiermaker pa Kultura: alfrida.martis@bonairegov.com
