For di 19 te ku 23 di mei 2025 a tuma lugá e di dos konferensia di DCALFA (Dutch Caribbean Agriculture, Livestock, and Fisheries Alliance – Aliansa Karibe Hulandes pa Agrikultura, Krio di Bestia i Piskamentu). E evento tabata un éksito grandi i a brinda un plataforma balioso pa e islanan ruman di e área karibe hulandes pa kompartí konosementu, eksperensia i ‘best practices’, i pa fortifiká e kolaborashon den sektornan di agrikultura, krio di bestia i piskamentu mas aleu.
E konferensia a marka un logro importante den e esfuersonan konhunto di Aruba, Boneiru, Kòrsou, Saba, Sint Eustatius i Sint Maarten pa desaroyá sistemanan sostenibel di kuminda i oumentá e siguridat di kuminda lokal. Den luna di yüni 2023 e islanan a firma un Memorandum of Understanding (MoU), den kua nan a pone énfasis riba e kompromiso kolektivo pa komunikashon, kolaborashon i interkambio di konosementu mas efektivo. E aliansa di DCALFA ta hunga un ròl krusial den promoshon di práktikanan di agrikultura sostenibel, mehorashon di salú i produktividat di e bestianan, i maneho responsabel di piskamentu den region.
E konferensia ku a dura sinku dia, a kuminsá ku un apertura ofisial, kaminda entre otro gezaghèber John Soliano, diputado Anjelica Cicilia, presidente di DCALFA Nathalie Maduro for di Aruba i vise presidente Shervin Frederick for di Sint Maarten a aksentuá importansia di kolaborashon. Despues di esei a informá e mas òf ménos 55 partisipantenan, inkluyendo representante di kunukeronan, piskadónan i hóbennan tambe, tokante vários inisiativa, entre otro lansamentu di e wèpsait di DCALFA i presentashon di proyektonan inovativo, manera BonCirc, PHITO i investigashon di e situashon aktual di e sektor di piskamentu.
Puntonan kulminante di e konferensia
E konferensia no a ofresé solamente espasio pa diferente presentashon i diskushon, pero tambe pa tayernan interaktivo i bishita den vèlt. Por menshoná ku e partisipantenan dia 20 di mei a eksplorá un seri di empresa i organisashon lokal, entre otro Kunuku Copacabana i Punta Blanku, Daily Catch Fisherman's Market, Tera Barra Native Garden, RoffaReefs, LVV i Nature Cooking School. E partisipantenan a haña oportunidat pa siña direktamente for di nos komunidat lokal i optené konosementu ‘hands-on’.
Riba djaweps 22 di mei a tuma lugá un diskushon ku representantenan di e diferente islanan i di Hulanda, inkluyendo minister Geoffrey Wever di Aruba, diputado Anjelica Cicilia di Boneiru i Hamza Kacha di ministerio di Klima i Kresementu Bèrdè. E grupo akí a papia tokante e vishon di maneho pa siguridat di kuminda den region, un tópiko ku ta krusial pa futuro di e área di Karibe Hulandes. Durante e diskushon a tuma lugá un diálogo tambe ku piskadónan, kunukeronan i hóbennan tokante nan desafionan i nan soñonan.
A sera e konferensia ku un konsulta tokante prolongashon di e MoU na aña 2026, loke lo tuma lugá na Sint Maarten. Ku esaki a enfatisá e kolaborashon di e islanan riba tereno di agrikultura, piskamentu i krio di bestia mas aleu. E evento di klousura a brinda tambe un oportunidat pa presentá aktividatnan lokal, manera e Dia Habrí di e departamento di Agrikultura, Krio di Bestia i Piskamentu (LVV) riba djasabra 24 di mei.
Un bista riba futuro
E di dos konferensia di DCALFA a pone un base pa desaroyo mas aleu di sektornan sostenibel i resiliente di agrikultura, krio di bestia i piskamentu den área di Karibe Hulandes. E konferensia no solamente a stimulá interkambio di konosementu i kòmbersashonnan importante, pero tambe a fortifiká e kolaborashon entre e islanan ruman. DCALFA ta sigui hasi esfuerso pa sostené komunidatnan lokal i pa traha riba solushonnan inovativo pa e sektornan primario den region.
‘Nos ta anhelá pa mira e siguiente pasonan den nos trayekto konhunto pa logra un sistema di kuminda mas sostenibel pa e área di Karibe Hulandes. E konferensia na Boneiru no tabata solamente un bista bèk riba e progreso ku nos a logra, pero tambe un bista padilanti riba loke ainda huntu nos por alkansá,’ segun Nathalie Maduro, presidente di DCALFA.
Por mira e apertura ofisial di e konferensia i e diskushon den grupo riba e medionan sosial di Entidat Públiko Boneiru.
