For di 19 te ku 23 di mei 2025 orguyosamente Boneiru ta anfitrion di e di dos konferensia di Dutch Caribbean Agriculture, Livestock, and Fisheries Alliance – DCALFA (Aliansa Hulandes Karibense pa Agrikultura, Krio di Bestia i Piskamentu). E enkuentro importante akí ta trese representantenan di tur seis isla den e parti karibense di Reino – Aruba, Boneiru, Kòrsou, Saba, Sint Eustatius i Sint Maarten – i un delegashon for di Hulanda Oropeo huntu, pa traha riba un futuro konhunto pa agrikultura, krio di bestia i piskamentu sostenibel na e islanan.
DCALFA
E konferensia ta forma un momentu importante di kolaborashon, interkambio di konosementu i fortifikashon di laso entre e islanan. For di firmamentu di un ‘Memorandum of Understanding’ (MoU) den luna di yüni 2023, e islanan ta trahando huntu pa mehorá siguridat di kuminda i stimulá produkshon lokal. Den esaki DCALFA ta e faktor di konekshon i ta hunga un ròl klave den promoshon di práktikanan sostenibel i dunamentu di sosten na kunukeronan, kriadónan di bestia, piskadónan i nos komunidat mas amplio.
Fortifikashon di kolaborashon pa futuro
“E konferensia di DCALFA ta un momentu di konsulta, pero prinsipalmente tambe un paso den direkshon di kolaborashon fortifiká i un futuro resiliente i sostenibel pa nos islanan”, segun diputado Anjelica Cicilia.
Puntonan kulminante di e konferensia
Un momentu importante durante e konferensia ta lansamentu di e wèpsait ofisial di DCALFA, ku ta bai fungi komo plataforma di informashon i komunikashon pa tur esnan enbolbí den nos region. Durante e siman un diskushon di panel di nivel haltu a base di maneho lo tuma lugá tokante desaroyo di un vishon konhunto riba siguridat di kuminda pa Karibe Hulandes, kaminda ta deliberá tokante e base pa un futuro kolaborashon i maneho. Na e diskushon akí entre otro diputado Anjelica Cicilia di Boneiru, diputado Recheline Leerdam di Sint Eustatius i minister Geoffrey Wever di Aruba ta partisipá.
Partisipantenan
E konferensia ta yama bon biní na mas òf ménos 55 partisipante, inkluyendo miembronan di DCALFA, funshonarionan di gobièrnu, representante di koperativanan di agrikultura i piskamentu i empresarionan hóben for di e sektornan primario. Kontribushonnan di e Ministerio di Asuntunan Ekonómiko i e Ministerio di Agrikultura, Piskamentu, Siguridat di Kuminda i Naturalesa ta spònser e último grupo akí, i esaki ta organisá dor di Entidat Públiko Boneiru i Servisio di Reino pa Hulanda Empresarial (Rijksdienst voor Ondernemend Nederland (RVO).
Por sigui e konferensia i e diskushon di panel via e ‘livestream’ riba página di FaceBook di entidat públiko Boneiru.
