Relashoná ku e sistema ku ta pasando, Entidat Públiko Boneiru ta hasi un yamada na siudadanonan pa prepará nan mes pa hopi áwaseru i mal tempu. Esaki lo tuma lugá riba djaweps i lo kontinuá te djabièrnè mainta. Un atvertensia ta bai pa doñonan di boto chikí pa bientu for di sùitwèst riba djabièrnè.
Te awor no tin nodi di drenta pániko i no tin un situashon di kalamidat. Si esaki kambia, Entidat Públiko Boneiru lo informá pueblo mesora.
Kiko bo mes por hasi?
- Kontrolá si bo kas ta seif pa ora áwaseru kai duru. Si bo no por keda kas, buska un refugio serka famia òf amigu.
- Sòru pa bo bestianan di kas ta na un lugá seif, preferiblemente paden.
- Si tin mal tempu, saka stèker di tur aparato eléktriko for di stòpkòntakt.
- Usa telefòn fiho solamente ora esaki ta nesesario.
- Bo ke yama un servisio di emergensia? Chèk promé si di bèrdè ta trata di un kaso di emergensia, òf si ta algu ku por warda. Chèk tambe si ta ‘meldkamer’ mes bo mester òf ku ta un otro hende bo tin mester. Asina nos ta evitá ku nos ta sobrekargá e ‘meldkamer’.
- Download e Disasterprep app riba bo telefòn.
Bo tin mester di mas informashon?
Bishitá https://bonairegov.com/bestuur-organisatie/overstroming pa mas tep òf wak den e Disasterprep App.
