Komo parti di outomatisashon di Biblioteka Públiko Boneiru, na e momentu akí nan ta instalá un sistema nobo pa fia buki. Ku esaki for di 26 di yüni 2023 ofisialmente ta remplasá e sistema bieu di ‘Koha’ ku e sistema nobo di ‘Wise’. Wise tin hopi bentaha. Por ehèmpel por tira bista riba e kolekshon di buki via un wepsait nobo i miembronan di biblioteka por reservá i prolongá buki for di kas. Ta añadí tambe hopi buki pa grandi i chikí na e kolekshon. Pa motibu di e trabounan akí biblioteka lo ta será dia 24 di yüni. E outomatisashon ta forma parti di e desaroyo ku biblioteka ta pasando aden.
Durante henter luna di yüni empleadonan di Biblioteka Públiko Boneiru ta traha huntu ku un tim for di Hulanda di e Online Computer Library Center (OLCL) pa instalashon i uso di e sistema nobo di Wise. Durante e periodo akí ta kapasitá empleadonan di biblioteka den uso di e sistema nobo, ta instalá e software nobo i ta hinka henter e kolekshon di buki manualmente den e sistema.
Den un tempu kòrtiku lo hasi hopi trabou i pa e motibu akí biblioteka lo ta será tambe entre djamars 20 di yüni 08.00 or i djaluna 26 di yüni 13.00 or.
For di djaluna 26 di yüni 2023 pa 13.00 or ta hasi uso solamente di e sistema nobo di Wise. E ora ei miembronan di biblioteka por pasa un ratu pa tuma un tarheta nobo di biblioteka i tira un bista den biblioteka.
Bo tambe ke bira miembro di biblioteka? Esei ta posibel! Te ku 18 aña miembresia di biblioteka ta grátis. Pa adulto un miembresia ta kosta $6,- pa aña. Pasa libremente na biblioteka na Kaya Gramèl s/n òf yama 715 – 5344 pa mas informashon.
