Despues di un trayekto largu ku a keda ehekutá kuidadosamente, e momentu a yega pa reapertura di e plenchi di hunga i lugá di enkuentro renobá den ‘Parke Tului’.
Ku e reapertura akí nos ta honra Arthur ‘Tului’ Domacassé, ku ta e persona ku e parke a haña su nòmber. Tului su nòmber i nifikashon ta inseparablemente ligá na e sitio akí.
E renobashon ta inkluí entre otro wega nobo pa mucha, área ku sombra, ducha pafó i vários fasilidat adishonal ku ta kontribuí na siguridat, komodidat i aksesibilidat pa famia, landadó i rekreante. Ku esaki Parke Tului atrobe ta un lugá sentral di enkuentro pa grandi i chikitu.
A realisá e proyekto akí danki na un kolaborashon amplio i enbolbimentu intensivo di nos komunidat. Vários organisashon i grupo a kontribuí na renobashon di Parke Tului, entre otro Fundashon Parke Tului.
Indebon ta gradisí tur partner ku a hasi e reapertura akí posibel, entre otro Entidat Públiko Boneiru, Ministerio di Salubridat, Bienestar i Deporte (VWS), Fundashon Parke Tului, Jantje Beton, e klupnan di landamentu enbolbí, habitantenan di bario, i e kontratistanan Bodifee Design i Bonned, ku ta esnan responsabel pa e diseño i ehekushon.
Nos ta pidi públiko pa huntu nos kuida Parke Tului. Si tin kualke daño, situashon insigur òf otro problema, por fabor informá nos na Indebon di esaki via 7155318, pa asina nos por tuma akshon na tempu i mantené kalidat i siguridat di e parke.
Kordialmente nos ta invitá públiko pa disfrutá di e plenchi di hunga i lugá di enkuentro renobá Parke Tului.
