Kolegio Ehekutivo a lesa e rapòrt di ILT i paso pa paso ta kontinuá ku realisashon di mehorashon. Dia 7 di novèmber Inspekshon di Ambiente di Biba i Transporte (Inspectie Leefomgeving & Transport – ILT) a publiká un asina yamá rapòrt di IBT (supervishon inter-atministrativo). E rapòrt ta deskribí e konklushonnan di e inspekshon di ILT tokante e manera ku Entidat Públiko Boneiru ta duna ehekushon na dunamentu di pèrmit, supervishon i mantenshon di lei relashoná ku e Lei VROM BES (regla pa konstrukshon i medio ambiente).
Segun ILT, Entidat Públiko Boneiru a pone vários paso den bon direkshon den kaso di ehekushon di tareanan di dunamentu di pèrmit, supervishon i mantenshon di lei rònt di e Lei VROM BES.
Dia 1 di aprel 2024 e asina yamá Dekreto di Establesimentu i Aktividat BES (Inrichtingen & Activiteitenbesluit BES – IAB) a drenta na vigor. Ta trata akí di regla nobo i kompleho pa protekshon di medio ambiente. Importante ta pa empresanan haña oportunidat pa kumpli ku e reglanan akí i ku nan ta bon informá. Pa e motibu akí rònt di medio ambiente na fin di luna di sèptèmber a organisá un eksposishon di medio ambiente pa empresanan di konstrukshon i hóreka. Durante e eksposishon di medio ambiente a duna informashon na empresanan tokante e reglanan nobo di medio ambiente i tokante e echo ku empresanan ta hunga un ròl importante den protekshon di medio ambiente. Entidat Públiko Boneiru ta konfia ku empresanan lo asumí nan responsabilidat. Paso pa paso nos ta trahando riba mehorashon.
Entidat Públiko Boneiru ta haña importante pa lokalmente ehekutá e tareanan ku ta surgi for di e Dekreto di Establesimentu i Aktividat BES (IAB) riba tereno di medio ambiente. E punto di salida ta ‘Siña nos piska’ i bin yuda nos realisá esaki. Pa siña piska, manera dunamentu di pèrmit di medio ambiente, supervishon i mantenshon di lei, ta algu kompleho i ta rekerí tempu pa dominá esaki. Den esaki Entidat Públiko Boneiru ta traha huntu ku
Omgevingsdienst Nederland (ODNL), un organisashon ku ta akapará 28 ‘omgevingsdienst’ regional na Hulanda. Empleadonan lokal ku ya kaba ta den servisio, ta haña formashon i kapasitashon, i tambe nos ta reklutando empleadonan públiko nobo. Paso pa paso nos ta trahando riba mehorashon.
E direktoradonan di Planifikashon di Desaroyo i di Supervishon i Mantenshon di Lei kada un ta traha riba su mes i tambe konhuntamente pa logra e mehorashonnan nesesario. Ku sosten di Omgevingsdienst Nederland a prosesá un parti signifikante di e petishonnan bieu pa konstrukshon, i kada biaha ta trata pèrmitnan di konstrukshon mas na tempu. A intensivá e supervishon riba konstrukshon sin pèrmit, i a imponé mas òf ménos 60 paro di konstrukshon, pa motibu ku e pèrmit no tabata na òrdu òf pa motibu ku no tabatin kumplimentu ku e pèrmit. Riba término korto ta realisá e alohamentu konhunto di departamento di Realisashon di Planifikashon i di Desaroyo i Supervishon i Mantenshon di Lei, di manera ku e kolaborashon lo sigui mehorá. Paso pa paso nos ta trahando riba mehorashon.
Entidat Públiko Boneiru ta rekonosé ku tres di e kasonan individual ku ILT a trese padilanti, entre otro Selibon, ta ehèmpel di kasonan kaminda mehorashon ta nesesario. Korektamente ILT ta remarká ku tin ora tin kestion di situashonnan kompleho i urgente. Entidat Públiko Boneiru ta traha paso pa paso riba mehorashon. A imponé un asina yamá ‘last onder bestuursdwang’ i ta pone medionan i material disponibel pa Selibon pa tuma e medidanan nesesario.
Segun instrukshon legal, na kuminsamentu di aña 2026 Konseho Insular i e minister di Infrastruktura i Maneho di Awa (I&W) lo risibí un raportahe di e resultadonan di henter aña 2025. A base di esaki e ora ei ta ofresé tambe e Programa di Ehekushon 2026.
Paso pa paso nos ta trahando riba mehorashon. Esaki pasobra: ta nos isla i nos responsabilidat.
