Henter aña GGD Boneiru ta monitoreá kua ta e malesanan infeksioso ku ta aparesé na nos isla. Kada kuartal nos ta duna un aktualisashon kòrtiku. Di e manera akí tur hende ta keda na altura di loke ta pasando i di loke bo mes por hasi pa keda salú.
Influenza (grip)
For di luna di desèmber 2025 mundialmente nan ta mèldu un temporada di grip tempran i mas fuerte, entre otro na Fransia, Oustralia, Merka, Canada, Argentina i Bolivia. E temporada akí e suptipo A (H3N2) subclade K (“super K”) ta parse esun ku ta mas presente. Pa e motibu akí den medionan di komunikashon tin hopi atenshon pa esaki i tin pregunta tokante un posibel ‘superflu’ nobo.
Mayoria hende ku tin influenza ta haña keho normal di grip. Serka sierto hendenan e vírùs por kousa keho mas serio, manera pulmonia. Esaki ta sosodé prinsipalmente serka hende ku un sistema imunológiko débil. Den mayoria pais ta trata prinsipalmente di hende grandi (65+) ku ta keda hospitalisá òf ku ta fayesé debí na e vírùs. Hopi biaha ta trata di hende ku no a pasa angua kontra grip.
Na Hulanda Oropeo ainda no tin un epidemia di grip (fuente: RIVM). Na e islanan franses karibense Martinique, Guadeloupe, Saint Martin i Saint Barths, influenza A ta aparesé mas tantu biaha. Tambe na e islanan akí mas hende ta bai nan dòkter di kas ku keho di grip (fuente: Santé Publique Frankrijk).
GGD Boneiru ta traha huntu ku e laboratorionan, e dòkternan di kas i hòspital pa monitoreá e vírùsnan di via respiratorio. Na Boneiru for di fin di luna di òktober influenza A ta aparesé mas tantu biaha. Na Boneiru normalmente nos ta mira mas influenza entre e lunanan di yanüari i aprel. Ku awor akí e vírùs ta aparesé mas tempran ku normalmente ta e kaso, ta kuadra ku e señalnan prosedente di otro paisnan tokante grip. No ta konosí ainda si ta e mesun suptipo di na otro paisnan, ta aparesé na Boneiru tambe.
Malesa di sangura
Den e lunanan òktober te ku desèmber ménos hende a bai nan dòkter di kas ku keho di un malesa di sangura, manera dengue. Den e periodo akí tabatin en total 18 infekshon di dengue. Esaki ta hopi ménos kompará ku e mesun periodo na aña 2024. E tempu ei nan a mèldu 45 hende ku dengue, djis promé ku e di dos brote grandi na nos isla.
GGD Boneiru ta supliká tur hende pa paga bon tinu riba posibel lugánan di brui di sangura rònt di nan kas. Esaki pasobra na Boneiru sangura por transmití otro malesa tambe aparte di dengue, manera por ehèmpel Chikungunya.
Na aña 2025 na Cuba nan a mèldu vários kaso di Chikungunya. Na Barbados tambe den luna di novèmber nan a mèldu infekshon nobo di Chikungunya. Na e parti franses di Sint Maarten den luna di desèmber nan a mèldu un promé kaso di Chikungunya (fuente: PAHO). GGD Boneiru ta tene e situashon den nos region bon na bista. Na e seis islanan di Karibe Hulandes ainda nan no a mèldu hende ku Chikungunya. E último brote grandi na e seis islanan tabata entre aña 2014 i 2016.
Bo tin pregunta tokante malesa di sangura? E ora ei wak riba www.bonairegov.com/pa/sangura na preguntanan hopi hasí.
Bakunashon pa biahero
For di kuminsamentu di aña 2025 tin un brote di kentura hel na Brasil i Colombia (fuente: PAHO). Den luna di mart 2025 GGD Boneiru pa medio di un komunikado pa prensa a trese e bakunashon kontra kentura hel èkstra bou di atenshon di baiheronan ku ta bai Sur Amérika. Den e di kuater kuartal di aña 2025 GGD tabatin 120 konsulta di biahero. Tabata trata akí prinsipalmente di biahe pa Colombia, Sürnam, Peru i Paraguay.
Bakunashon kontra kentura hel ta obligatorio pa biaheronan ku den e shete dianan promé ku nan yegada na Boneiru tabata den un área di riesgo haltu. Esaki ta pa beibi for di 9 luna tambe.
Pa mas informashon:
- Yama (+599) 715 5324 òf manda un email na IZB@bonairegov.com
- Wak riba Vaccinaties Bonaire | GGD Reisvaccinaties
