Ku orguyo UNICEF Hulanda ta anunsiá finalisashon eksitoso di e promé Partisipashon di Hóben Interinsular na Hulanda Karibense. E evento a tuma lugá na Sint Maarten for di 20 te ku 23 di aprel 2025. Diesocho hóben di 14-27 aña di Boneiru, Saba i Sint Eustatius a eksperensiá un enkuentro fasinante dirigí riba promoshon di partisipashon di hóben i empoderamentu.
A organisá un seri di tayer interaktivo, ku enfoke riba liderazgo, desaroyo di komunidat i atendementu ku interes. Esaki ta duna hóben e abilidatnan i konosementu ku ta nesesario pa por trese kambio den nan komunidat. E interkambio akí ta brinda hóben un oportunidat úniko pa kuminsá un diálogo signifikativo, kompartí nan perspektivanan i traha huntu riba inisiativanan ku ta atendé ku e desafionan i oportunidatnan den nan komunidatnan.
‘Por logra mas enbolbimentu, perspektivanan nobo i solushonnan inovativo di hóbennan pa e tipo di tópikonan akí solamente pa medio di partisipashon’, segun Margje Troost, spesialista senior di derecho di mucha pa área karibense na UNICEF Hulanda. ‘Pa laga hóbennan siña, krese i kontribuí na bienestar di nan komunidatnan, nan mester haña e hèrmèntnan adekuá. Manera un ‘network’ i informashon tokante nan derechonan sivil i akseso na esakinan.’
‘‘Tabata un bon eksperensia, mi a siña hopi, mi a siña konosé otro islanan i mi a konektá ku hopi lider hóben di futuro”,segun e partisipante Ramso (18). ‘Mi ta spera ku e biahe akí ta sòru pa un mihó relashon ku nos konsehonan hubenil i ku di bèrdat nos ta hasi un diferensia den bida diario.’ Na esaki Zoe (16) ta añadí lo siguiente: ‘Esaki tabata un oportunidat fantástiko i personalmente mi ta haña ku mester tin mas di e tipo di eventonan akí.’
UNICEF Hulanda ta mira bèk riba un interkambio eksitoso i ta sigui traha pa duna hóben den Karibe Hulandes un futuro yen di oportunidat i desaroyo personal.
