Awor bishitantenan di Boneiru por paga e Visitor Entry Tax online promé ku nan biahe.
A amplia e wèpsait bonaireisland.com di Tourism Corporation Bonaire ku e página Entry Tax. Awor e pagina akí ta aktivo pa e pago online i banda di esei e ta ofresé informashon adishonal tokante e Visitor Entry Tax.
Ta pidi tur bishitante di Boneiru pa registrá promé ku nan biahe via e wèpsait i paga e Visitor Entry Tax. Unabes ku e bishitante a registrá i paga e ta risibí un QR-code personal via email ku kua na yegada solamente un kontròl tin ku tuma lugá.
E biaheronan ku no a paga online promé ku nan biahe, por paga na momentu ku nan yega Boneiru tambe.
Durante e promé periodo, pago online ta solamente posibel ku creditcard. Pronto lo amplia esaki ku Paypal i iDeal. Na yegada na Boneiru por paga ku diferente karchi manera Maestro, Visa i Mastercard. No ta posibel pa paga e Visitor Entry Tax ku sèn kèsh.
Habitantenan di Boneiru ku tin un sédula no tin mester di registrá adelantá, pero nan por mustra nan sédula pa haña akseso na Boneiru sin pago i sin QR-code.
Bo ke mas informashon tokante ken sí i ken no tin mester di paga e Visitor Entry Tax òf bo ta buskando mas informashon? Bai riba bonaireisland.com òf manda un email na marketing@tourismbonaire.com
Esaki ta un komunikado pa prensa di Entidat Públiko Boneiru den kolaborashon ku Tourism Corporation Bonaire.
