Tur hende ku ta biaha pa Boneiru i no ta biba na Boneiru mester paga un Visitor Entry Tax na yegada na Boneiru. E Visitor Entry Tax akí, o sea Boneiru su impuesto di turista, a drenta na vigor dia 1 di yüli último.
Bishitantenan di 12 aña i mas chikitu i habitantenan di e anterior Antia Hulandes ta paga 10 US dòler pa bishita. Tur otro bishitante di 13 aña bai ariba tin ku paga 75 US dòler. Habitantenan di Boneiru no tin mester di paga e Visitor Entry Tax.
Biaha ku un sédula bálido komo prueba komprobabel.
Ora ku bo ta biaha pa Boneiru for di un di e islanan di e anterior Antia Hulandes (Aruba, Korsou, Sint Maarten, Sint Eustatius i Saba), bo ta paga un Visitor Entry Tax di 10 US dòler pa kada bishita na Boneiru. E ora ei bo tin ku komprobá sí ku un sédula bálido ku bo ta biba na un di e islanan akí.
Paga tinu, kopia di bo sédula no ta sufisiente. Bo mester tin bo sédula ofisial huntu ku bo. Evitá tempu di warda na aeropuerto i bai promé ku bo biaha pa Boneiru riba e wèpsait bonaireisland.com, klek den e menú riba Entry Tax i registrá i paga e Visitor Entry Tax promé ku bo biaha. Una bes ku bo a registrá i paga, bo ta risibí un QR-code personal via email ku kua na bo yegada solamente un kontròl tin ku tuma lugá.
Por paga na yegada na aeropuerto tambe. Por hasi esaki ku diferente karchi, manera creditcard, karchi di bankomátiko i e maestro-card. No por paga ku sèn kèsh. Bishitantenan ku ta yega Boneiru ku boto òf yate tambe tin ku paga e Visitor Entry Tax. Bo ta deseá mas informashon tokante e Visitor Entry Tax? Bai riba bonaireisland.com òf manda un email na marketing@tourismbonaire.com
Esaki ta un komunikado pa prensa di Entidat Públiko Boneiru den kolaborashon ku Tourism Corporation Bonaire.
Anekso huntu ku e komunikado pa prensa: e bòrchi na yegada na Bonaire International Airport relashoná ku e Visitor Entry Tax.
