Ku orguyo Kolegio Ehekutivo di Entidat Públiko Boneiru (OLB) ta anunsiá ku awe, 30 di òktober 2025 kompra di e anterior tereno di BOPEC di parti di Curoil Bonaire Terminals N.V. a keda formalisá awe. E akuerdo aki, ku ta enserá traspaso di derecho di èrfpagt i komienso di un proyekto di saneamentu riba eskala grandi, ta un paso históriko den direkshon di un futuro duradero i próspero pa Boneiru.
“Awe ta marka un era nobo pa nos isla,” segun Kolegio Ehekutivo. “Nos a logra un solushon integral i finansieramente sigur pa un di e retonan ambiental mas kompleho di Boneiru. Saneamentu i reinisio di e terminal ta bai man den man, loke ta krea un situashon ‘win-win’ nunka bisto pa nos poblashon, nos ekonomia i nos medio ambiente.”
Seguridat Ekológiko i Finansiero pa Generashonnan di Futuro
E akuerdo ta garantisá ku lo atendé ku e kontaminashon urgente di suela i di e awa den suela riba tereno di BOPEC. Kolegio Ehekutivo a bai di akuerdo ku lantamentu di Fundashon Saneamentu di Parselanan di BOPEC (Stichting Sanering BOPEC Percelen), ku ta bai ehekutá e saneamentu basá riba e plan ku ekspertonan a formulá.
- Garantia Finansiero: A reservá un suma di 22,68 mion euro (inkluyendo 20% di riesgo adishonal) for di e biennan despues di bankarota di BOPEC pa finansiá e saneamentu. Esaki ta nifiká ku e gastunan di e daño ambiental históriko aki no ta bai resultá pa e generashonnan di futuro òf pa e pagadónan di impuesto di Boneiru.
- Protekshon di Medio Ambiente: E saneamentu ta enfoká riba puntonan urgente di medio ambiente, manera saneamentu parsial di e asina yamá 'sludge pit'. Banda di esaki e supervisornan, inkluyendo Inspekshon di Ambiente di Biba i Transporte (Inspectie Leefomgeving en Transport – ILT) i Rijkswaterstaat (RWS), a bai di akuerdo ku e plan di saneamentu, loke ta stipulá atendementu ku e kontaminashon históriko hurídikamente.
Siguridat di Kombustibel i Impulso Ekonómiko
E atkisishon di parti di Curoil Bonaire Terminals N.V. (un filial di Curoil) tin un balor agregá stratégiko pa henter region karibense i, esaki ta krusial, pa Boneiru mes.
- Siguridat di Kombustibel: Reanudashon di e terminal ta promové siguridat di kombustibel i energia di Boneiru riba término largu, loke ta un meta fundamental di maneho.
- Aktividat Ekonómiko: E terminal, situá den bisindario di Rincon, lo ta un motor importante pa aktividat ekonómiko i invershon den nos isla, pero en partikular pa Rincon.
Oportunidatnan Spesial pa Rincón: Empleo i Konfiansa
Kolegio Ehekutivo ta kontentu ku e reanudashon akí tambe tin konsekuensia direkto i positivo tambe pa nos komunidat lokal, spesialmente komunidat di Rincon i bisindario.
- Empleo: Curoil tin intenshon di tuma un gran mayoria di e empleadonan aktual di BOPEC over i ofresé nan kontratonan laboral nobo, loke ta sigurá i promové empleo krusial riba término largu.
- Kompensashon Finansiero pa Eks Empleadonan: Un parti esensial di e palabrashonnan ta promesa di e ‘curator’ ku lo paga e demandanan pendiente di e eks empleadonan inkluyendo salario atrasá promé ku fin di e aña akí. Esaki despues di un periodo largu di insiguridat porfin ta trese e trankilidat finansiero deseá pa e famianan akí.
A logra e meta akí pa medio di konsulta intensivo i un esfuerso komun di Kolegio Ehekutivo, e ‘curator’ i Curoil. E traspaso formal di e derecho di èrfpagt pa Curoil Bonaire Terminal N.V. a tuma lugá awe, 30 di òktober 2025, loke ta hasi posibel pa e plan duradero aki por ranka sali mesora.
