Durante e dianan tras di lomba delegadonan di tur seis isla di e parti karibense di Reino a partisipá na e Tayer di Fondonan di Union Oropeo. A organisá e tayer akí spesífikamente pa konhuntamente wak den Reino kon por traha mas mihó huntu pa saka mas fondo for di Union Oropeo pa e islanan. Banda di e seshonnan di tayer pa yega na un plan di aserkamentu pa esaki, ayera e partisipantenan a bishitá dos lokalidat na Boneiru ku fondonan di Union Oropeo ta finansiá, entre otro e instalashon di purifikashon di awa shushi na WEB i e proyekto di Galileo.
E proyektonan akí ta ehèmpelnan tangibel tokante kon Boneiru ta hasi uso di fondonan di Union Oropeo. E partisipantenan a haña un splikashon di e dos proyektonan. Ya kaba algun isla a mustra atenshon spesífiko pa siña mas tokante kon Boneiru a ehekutá e proyektonan akí i ta utilisá nan pa desaroyá e isla mas aleu. A base di e bishitanan akí ta pensando awor kon e islanan konhuntamente por kuminsá ku eventual trayektonan di kontinuashon.
A hasi un komienso ku ponementu di un base pa huntu hasi uso di e oportunidatnan i posibilidatnan komo parti karibense di Reino. Un paso importante pa e islanan i alabes un ‘input’ pa e Enviado Spesial Edison Rijna inkluí den e plannan pa dunamentu mas aleu di kontenido na su aporte na esaki.
