Riba djaweps 9 di febrüari 2023 representantenan boneriano di OCT Youth Network i International Desk di Boneiru ta organisá ‘European Cultural Exchange Fair’. Meta di e evento akí ta pa inspirá hóbennan boneriano i interkambiá eksperensia tokante studia òf traha den eksterior.
Alumnonan di enseñansa avansá i enseñansa profeshonal sekundario (MBO) ku tin intenshon pa despues di optené nan diploma bai sigui studia òf traha den eksterior, ta kordialmente bon biní. E evento ta tuma lugá na Jong Bonaire for di 17:00 or te 19:00 or. Durante e atardi akí boluntarionan – esakinan ta profeshonalnan ku a finalisá nan estudio i/òf studiantenan ku ya kaba a yega di traha òf kore stazje den Union Oropeo – lo kompartí nan eksperensianan.
E ‘European Cultural Exchange Fair’ ta den signo di interkambio kultural. Nan no ta solamente interkambiá eksperensia ku otro, pero tambe kuminda for di e diferente paisnan kaminda e boluntarionan a studia òf traha. Bo ta interesá? E ora ei tuma kontakto ku un di e representantenan boneriano di OCT Youth Network i International Desk di Boneiru via bonaireoctnetwork@outlook.com
