Entrante 1 di mart 2023 mr Christopher Frans ta e sekretario insular nobo di Entidat Públiko Boneiru. Mr Christopher Frans ta traha pa mas ku 9 aña kaba na Entidat Públiko Boneiru, di kua kasi 2 aña komo sekretario insular athunto.
Opviamente un kandidato kualifiká pa e vakatura ku a habri na kuminsamentu di e aña akí. Despues ku e prosedura di solisitut a kana su kaminda, e eskoho a kai riba mr Christopher Frans pa bai okupá e funshon akí.
Mesora despues ku e anterior sekretario insular mr Nerry Gonzalez a kambia di funshon na aña 2020, e búskeda pa un sekretario insular nobo a kuminsá. Despues di un trayekto largu e tempu ei, a disidí pa nombra un sekretario insular pa un periodo di 2 aña ku komo tarea pa kapasitá un kandidato potensial lokal pa e funshon di sekretario insular.
Di e forma ei na luna di mart 2023 a nombra sra Wendy Pelk komo sekretario insular. El a okupá e funshon durante 2 aña i a prepará mr Christopher Frans i entrante 1 di mart ta traspasá su tareanan pa mr Frans. Den e periodo binidero sra Pelk lo sigui duna sosten na mr Christopher Frans i e organisashon. Kolegio Ehekutivo ta gradisí sra Wendy Pelk pa su dedikashon na e organisashon den e funshon di sekretario insular.
Despues di a finalisá su estudio na primeramente ‘De Hoge School’ na Den Haag i seguidamente na Rijksuniversiteit na Groningen, mr Christopher Frans a kuminsá traha komo trahadó di maneho na munisipio di Rotterdam. Ku e konosementu i eksperensia akí den su poder el a regresá Boneiru na luna di desèmber 2013.
Na Boneiru su karera a kuminsá komo konsehero di maneho senior na Direktorado di Komunidat i Kuido, pa seguidamente kontinuá den e funshon di konsehero di gobernashon di Gabinete di Gezaghèber, despues direktor interino di Direktorado di Maneho i Sosten i despues sekretario insular athunto. For di su regreso na su isla el a dediká su mes ku alma i kurason na nos isla i na su trabou i a prepará su mes pa e posishon di sekretario insular entrante 1 di mart 2023. Òf manera Christopher Frans mes lo a bisa: “It's not a matter of chance, but it's a matter of choice and hard work”.
