Kontròl intensivo riba supermarket i minimarket na Boneiru

Direktorado di Supervishon i Mantenshon di Lei, den kolaborashon ku Fundashon Tienda pa Konsumidó, a kuminsá ku kontròl intensivo riba supermarketnan i minimarketnan. E kontròlnan akí ta enfoká riba siguridat di kuminda i komparashon di preis di produkto den supermarketnan na Boneiru.

Kontròl di siguridat di kuminda i di preis

E kontròlnan ta forma parti di un plan di trabou di Direktorado di Supervishon i Mantenshon di Lei pa aña 2025 i nan ta ehekutá nan konforme e lei di siguridat di kuminda i e reglanan relashoná ku maneho di preis di sierto produktonan lokal. Durante e inspekshonnan nan no ta kontrolá solamente kalidat i siguridat di e produktonan alimentisio, pero nan ta ehekutá un registrashon amplio di preis tambe.

Asina ku a kompletá e registrashon di preis den tur tienda ku nan bishitá, Fundashon Tienda pa Konsumidó lo digitalisá e preisnan pa por hasi un análisis komparativo. Esaki ta duna konsumidónan un bista bon kla di na unda nan por hasi nan kompra mas barata.

Importansia di kontròl pa salubridat públiko

E kontròlnan akí ta di gran importansia pa protekshon di salubridat públiko i pa transparensia den stipulashon di preis. Pa medio di kompará e preisnan kolektá ku otro i hasi e resultadonan aksesibel, e konsumidonan ta haña un bista general klarito di e opshonnan mas bentahoso pa ora di skohe unda nan ta bai hasi kompra.

Banda di esaki nan ta kontrolá si e etikètnan riba e produktonan ta kumpli ku lei. Segun e Dekreto di etikashon di komestibel BES, un etikèt tin ku kontené informashon esensial, manera e fecha di vensementu. Lei ta prohibí benta di produkto di kua e fecha di vensementu a pasa kaba, pa motibu ku posibelmente esakinan no ta seif mas pa konsumí.

Puntonan di atenshon pa ora di hasi kompra

Direktorado di Supervishon i Mantenshon di Lei ta enfatisá importansia di hasi kompra na un manera konsiente i ta konsehá konsumidónan pa paga bon tinu riba etikèt di e produktonan promé ku nan kumpra esakinan. Paga entre otro tinu riba:   

• E fecha di vensementu;
• Si e empake ta intakto (bleki no mester ta machiká òf ku daño);
• Si e produkto no ta habrí òf kibrá.

Kontinuashon di e kontròlnan

E tim lo kontinuá semanalmente ku e kontròlnan den tur bario di Boneiru. Den forma sistemátiko e tim lo bishitá supermarketnan, minimarketnan i otro tiendanan ku ta bende komestibel, pa salbaguardiá kumplimentu ku regulashon. Di e manera akí Direktorado di Supervishon i Mantenshon di Lei i Fundashon Tienda pa Konsumidó ta uni forsa pa protehá bienestar di nos komunidat.

Mèldu iregurlaridat

Den kaso ku konsumidónan konstatá kosnan iregular den un supermarket òf un minimarket, nan por mèldu esaki na Direktorado di Supervishon i Mantenshon di Lei via email: bisami_th@bonairegov.com.