Riba djaweps 27 di novèmber 2025 e konferensia Protekshon di Salú a tuma lugá. E enkuentro ku GGD Boneiru a organisá, a trese ekspertonan lokal i regional, trahadónan di maneho i partnernan di kadena huntu pa papia tokante malesa infeksioso i preparashon pa futuro pandemianan na nos isla.
E konferensia a atraé un grupo diverso di partisipante i oradornan for di Kòrsou (Greenkidz Curacao), Aruba (DVG Aruba), Boneiru i Hulanda Oropeo (RIVM). Durante e konferensia e oradornan a kompartí konosementu balioso tokante disponibilidat pa bakunashon, salú seksual, prevenshon i kua ta e invershonnan ku ta nesesario pa prepará Boneiru mas mihó pa kualke brote den futuro. Nan a enfatisá ku un preparashon fuerte ta solamente posibel ku un kolaborashon estrecho entre profeshonalnan di kuido, gobièrnu, organisashonnan sosial i habitantenan di nos isla, i entre e islanan.
Banda di esaki a bira evidente ku salubridat públiko ta mas amplio ku solamente kuido di salú. E ta rekerí un enfoke sólido riba prevenshon: prevení malesanan infeksioso promé ku nan surgi. Nan a aksentuá ku Boneiru ya kaba ta poniendo bunita pasonan den esaki, manera e programa di Greenkidz. E programa akí ta pa mucha di 8 te 12 aña, ku den algun lès kreativo ta siña kon nan por prevení lugá di brui di sangura i di e manera ei protehá nan propio salú. Pero na mes momentu tin espasio pa desaroyo mas aleu i fortifikashon di preparashon.
E profeshonalnan i partnernan presente ta forma un ret balioso di eksperto ku konhuntamente ta traha pa logra un Boneiru fuerte i salú. Nan dedikashon i ekspertisio ta esensial pa logra progreso duradero riba tereno di kombatimentu di malesa infeksioso i di protekshon di salubridat públiko.
GGD Boneiru / Salubridat Públiko ta tene habitantenan di Boneiru na altura pa medio di su kanalnan ofisial, i ta alkansabel via 715 – 5330 òf publiekegezondheid@bonairegov.com
