Direktorado di Supervishon i Mantenshon di Lei a kuminsá ku un trayekto den fase pa restorashon i limpiesa di e lugá di stashoná outo na Stadion di Playa

Direktorado di Supervishon i Mantenshon di Lei a kuminsá ku un trayekto den fase pa restorashon i limpiesa di e lugá di stashoná outo na Stadion di Playa. Pa hopi tempu kaba ta usa e tereno akí pa almasenamentu di entre otro kònteiner, treiler, ekipo pisá i otro ophetonan. Debí na esaki e tereno no ta kompletamente disponibel mas pa e meta pa kua e tabata destiná i ta sierto riesgonan pa siguridat.

Un espasio públiko seif, ordená i bon mantené ta importante pa tur hende na Boneiru. Pa e motibu akí Direktorado di Supervishon i Mantenshon di Lei ta atendé ku e trayekto di restorashon i limpiesa akí den fase. Entretantu e doñonan ku ta konosí serka Entidat Públiko Boneiru a keda informá personalmente tokante e aserkamentu akí. Kaminda ta nesesario Direktorado di Supervishon i Mantenshon di Lei ta hasi palabrashon ku e usuarionan en kestion tokante ehekushon di e trayekto, di manera ku paso pa paso por restorá e tereno na un manera seif i kuidadoso.

Ta supliká usuarionan ku mester kita nan ophetonan, pa mèldu esaki minimalmente tres (3) dia di trabou adelantá na Direktorado di Supervishon i Mantenshon di Lei via +599 790 0707. Di e manera akí por prepará e trabounan bon i por tuma e medidanan di siguridat nesesario.

Direktorado di Supervishon i Mantenshon di Lei ta sigui tene supervishon riba e tereno i ta supervisá kumplimentu ku e reglanan vigente. Den e periodo binidero Direktorado di Supervishon i Mantenshon di Lei ta ehekutá e trayekto di restorashon i limpiesa mas aleu segun planifikashon. Enfoke di e diferente fasenan di e trayekto ta pa tuma e tereno den uso atrobe na un manera seif, ordená i konforme e destinashon.

Direktorado di Supervishon i Mantenshon di Lei ta apresiá koperashon i komprenshon di tur hende enbolbí. Huntu nos ta traha riba restorashon di e tereno, di manera ku por usa esaki atrobe na un manera seif, ordená i konforme e destinashon.

Den e periodo binidero Direktorado di Supervishon i Mantenshon di Lei ta tene nos habitantenan na altura di progreso di e trayekto di restorashon i limpiesa na Stadion di Playa.