Kolegio Ehekutivo di Entidat Públiko Boneiru durante su reunion di djaluna 26 di mei a disidí pa laga hasi un investigashon independiente di echo pa loke ta trata e prosedimentu rònt di un paro di konstrukshon i otorgamentu di un pèrmit di konstrukshon riba un tereno, riba kua un miembro di famia di un di e miembronan di Kolegio Ehekutivo tin derecho.
Motibu pa e desishon akí ta e echo ku riba djabièrnè 16 di mei último, Direktorado di Supervishon i Mantenshon di Lei a imponé un paro di konstrukshon relashoná ku e trabounan riba e tereno en kestion. Riba djasabra 25 di mei Kolegio Ehekutivo a tuma nota di e situashon akí. E tereno ta trata di propiedat di tata di diputado Cicilia, kende ta titular di kartera di Direktorado di Planifikashon i Desaroyo, bou di kua dunamentu di pèrmit pa konstrukshon ta kai.
Aunke ku na e momentu akí no tin kestion di iregularidat konstatá, Kolegio Ehekutivo ta konsiderá komo di gran importansia – ku bista tambe riba transparensia, integridat i persepshon públiko – ku ta identifiká e prosedura ophetivamente. Pa e motibu akí Kolegio Ehekutivo a disidí pa bou di direkshon di gezaghèber laga hasi un investigashon independiente di echo.
‘Konfiansa di komunidat den atministrashon públiko ta algu grandi’, segun Kolegio Ehekutivo den su desishon. ‘Kada forma di posibel konflikto di interes, òf asta aparensia di esaki, meresé un splikashon i transparensia kuidadoso.’
Den e kuadro akí Kolegio Ehekutivo alabes a ekspresá su sosten i apresio kompleto pa aktuashon di Direktorado di Supervishon i Mantenshon di Lei. Ta mira e manera ku a ehekutá e supervishon den un forma independiente, komo un ehèmpel di bon gobernashon i di gobernashon profeshonal. Kolegio Ehekutivo ta suprayá ku tur siudadano – sea ku nan ta habitante komun, miembro di Kolegio Ehekutivo òf di Konseho Insular, o sea famia di esakinan – ta igual pa lei i mester keda tratá den un forma igual na momentu ku tin señal di posibel iregularidat.
E investigashon ku nan a anunsiá no tin komo meta pa husga ningun persona, pero pa determiná si e prosedura di dunamentu di pèrmit i di supervishon a kana na un manera korekto i kuidadoso. Den konsulta ku gezaghèber ta elaborá e sistema di investigashon mas detayadamente, i en prinsipio un partido eksterno independiente lo ehekutá esaki. Na un momentu mas despues lo kompartí e resultado di esaki ku Konseho Insular i lo hasi esaki públiko, teniendo kuenta ku privasidat i koutela.
Ku e paso akí Kolegio Ehekutivo ke mustra su kompromiso ku transparensia, igualdat hurídiko i bon gobernashon, na interes di tur habitante di Boneiru.
