Kolegio Ehekutivo ta entregá presupuesto pa 2023 na tempu na Konseho Insular

Kolegio Ehekutivo a entregá presupuesto di Entidat Públiko Boneiru pa e aña binidero tambe na tempu na Konseho Insular. Ta kalkulá e entrada total pa 2023 na 72.6 mion dòler, esei ta 15 porshento mas tantu kompará ku e presupuesto di 2022. E entrada èkstra ta prinsipalmente debí na e impuesto nobo di turista i oumento di e kompensashon liber. Pa aña 2023 koutelosamente ta kalkula e entrada for di e impuesto di turista na 12.4 mion dòler en total, hasiendo e entrada akí tres biaha mas tantu kompará ku aña 2019. Ta presupuestá e gastunan na 73.5 mion dòler.

Pa kombatimentu di pobresa i sosten di gruponan vulnerabel, den kolaborashon ku Sentro Akseso Boneiru, a reservá un suma total di 3 mion dòler èkstra den presupuesto 2023. Tambe ta plania un invershon grandi di 4.5 mion dòler pa pone infrastruktura pa dos skol nobo. Banda di esei ta invertí fuertemente den ampliashon di kontratashon di personal i digitalisashon di Entidat Públiko Boneiru pa mehorá dunamentu di servisio na nos suidadanonan. Pa mantenshon di kaminda tin un suma total di 2.5 mion dòler disponibel, ku ekslushon di e sumanan di e programa di mas aña pa kaminda. A tene kuenta tambe ku e invershonnan pa e haf nobo di kònteiner i pa drecha espasionan públiko.

A presupuestá otro prioridatnan tambe

Otro prioridatnan pa kua ta presupuestá gastu ta stimulashon di empresariado i diversifikashon di ekonomia, e programa integral di deporte i un suma èkstra komo invershon pa e pista di ‘drag’ ku lo keda realisá pronto. Mas aleu a inkluí 400.000 dòler èkstra den presupuesto 2023 pa stimulá kultura mas bou di nos poblashon i pa por duna mihó sosten na organisashonnan di kultura. Pa promé biaha Entidat Públiko Boneiru lo reservá un suma tambe komo supsidio pa e tanki di dekompreshon. Tambe tin un suma èkstra pa e kampaña di informashon i programa di mantenshon di lei pa loke ta trata bienestar di bestia.

Den e presupuesto aprobá di aña 2022 a pronostiká un défisit di 1,38 mion dòler, pero finalmente Kolegio Ehekutivo a yega na un saldo presupuestario desbentahoso di 931.000 dòler. E presupuesto di mas aña sí ta balansá. E Kolegio di Supervishon Finansiero (CFT) a evaluá e presupuesto i a duna Kolegio Ehekutivo su konseho. A prosesá e puntonan di mehorashon relashoná ku esaki den e presupuesto ku a manda pa Konseho Insular. Dentro di poko lo trata esaki den Konseho Insular. Pa bo mes por tira bista den e presupuesto bo por klek akí.