Djaluna dia 18 di ougùstùs 2025 e aña eskolar pa e periodo di 2025-2026 a kuminsá. Kolegio Ehekutivo pa medio di diputado Peter Silberie, ke deseá tur alumno, tur dosente, tur otro miembro di personal i tur mayor hopi éksito i perseveransia. Kolegio Ehekutivo ta spera ku e aña eskolar nobo akí lo bira aún mas mihó ku e aña anterior.
Pa e hóbennan ku ta den klas di eksámen nos Kolegio ta manda palabranan di enkurashamentu pa nan konkretisá e aña eskolar akí ku e diploma tan anhelá. Pa e studiantenan ku ta bai sigui studia den eksterior, Kolegio Ehekutivo su deseo ta pa nan bini bèk despues i yuda desaroyá Boneiru mas ainda.
Apesar ku kisas tin biaha e estudio por ta difísil, Kolegio Ehekutivo ta spera pa tur studiante por perseverá i kaba nan estudio. Tambe nos ke deseá tur dosente hopi pasenshi i forsa pa tur dia di nobo nan por kumpli ku nan tarea bunita pero pisá.
Kolegio Ehekutivo ke deseá tur alumno, studiante, dosente i otro miembronan di personal tur klase di éksito i ku Bon Dios guia tur den bon kaminda.
