Den e di dos i e di tres kuartal di aña 2025 e investigashon di Kindmonitor a tuma lugá na Boneiru. Kindmonitor 2025 ta un kolaborashon entre GGD Boneiru, Mulier Instituur i JOGG i e ta haña sosten di Sentro Akseso. Pa medio di diferente kanal i instansia nan a invitá mayornan i kuidadónan pa yena un lista di pregunta online, manera via diferente video online, poster i personanan ku a tene enkuesta riba kaya.
Meta di e lista di pregunta tabata pa komprendé kiko nos muchanan entre 0 i 12 aña na Boneiru tin mester pa lanta salú i felis. E preguntanan tabata trata di tópikonan manera drumimentu, kuminda, kuido di boka, kantidat di ora dilanti pantaya, salú na skol i den akohida, i kosnan ku e muchanan a eksperensiá.
Pa medio di kontestá e lista di pregunta, e partisipantenan a duna informashon balioso pa mihó maneho i sosten. Ku resultado di e lista di pregunta, skolnan, barionan, profeshonalnan i trahadónan di maneho por determiná mas mihó riba kiko nan tin ku dirigí nan atenshon pa mehorá salú i kustumbernan diario di nos muchanan. Ehèmpel di e mehorashonnan práktiko akí ta punto pa bebe awa i kuminda saludabel na skol.
Pa Boneiru su Kindmonitor 2025 nan a yena 832 lista di pregunta. Nos ta gradisí tur mayor, kuidadó, skol, akohida di mucha i otro partnernan ku a partisipá na e Kindmonitor. Danki na boso aporte i yudansa awor nos sa mas mihó kiko ta importante pa salú i bienestar di nos muchanan na Boneiru.
Tur organisashon enbolbí por hasi uso di e informashon balioso akí pa traha huntu pa logra un futuro mas salú pa nos muchanan na Boneiru.
Relashoná ku Kindmonitor 2025, den e tempu binidero GGD Boneiru ta bai dediká atenshon èkstra na:
- Stimulá bebementu di awa;
- Sufisiente moveshon pa tur hende;
- Informashon i ayudo pa kome mas salú.
Nos ta invitá mayornan i tur otro hende na Boneiru pa lesa e resultadonan i konklushonnan riba Openbaar Lichaam Bonaire: Rapòrtnan maneho i investigashon. Si bo tin pregunta tokante e Kindmonitor 2025, bo por yama GGD Boneiru riba e number di telefòn 715 5324 òf manda un email na bonsaluggd@bonairegov.com.
