E tema akí ta bai mas leu ku solamente palabra. E ta un yamada pa para ketu na ken nos ta komo pueblo, kiko ta konektá nos i kiko ta hasi nos spesial. E ta rekordá nos ku huntu nos ta forma nos isla su forsa den nos kultura, nos tradishonnan, nos naturalesa i mas ku tur kos den nos hendenan.
Na kaminda pa Dia di Boneiru
E kaminda pa nos dia di fiesta ta mes importante ku e dia mes. Pa e motibu akí nos ta organisá un siman yen di aktividat signifikativo ku ta mustra Boneiru su diversidat i rikesa. Tur dia nos ta pone un paso den nos biahe konhunto:
• Djaluna 1 di sèptèmber – Sunset Jam Session na SKAL
Un anochi musikal pa huntu gosa di talento, hopi ritmo i energia di nos isla ku bahada di solo.
• Djamars 2 di sèptèmber – Sip & Paint
Kreatividat i enkuentro ta bini huntu durante un anochi ameno yen di arte i inspirashon.
• Djárason 3 di sèptèmber – Nochi di pelíkula “Nos Boneiru”
Un bista íntimo riba nos pasado i presente atraves di lèns di pelíkula. Un anochi pa siña i reflehá huntu.
• Djaweps 4 di sèptèmber – Un anochi bou di sombra di luna kla
Un anochi yen di poesia bou di luna yen. Poetanan i artistanan di “Spoken word” ta duna bos na storianan i sintimentunan ku ta konektá nos isla i nos komunidat.
• Djabièrnè 5 di sèptèmber – Komunidat den Akshon
Un dia di boluntario kaminda huntu nos ta lora nos manga di kamisa. Pa medio di traha huntu pa nos isla, nos ta mustra ku nos forsa ta den union i kompromiso pa Boneiru.
Riba djabièrnè 5 di sèptèmber parti tramèrdia e seremonia protokolar tambe ta tuma lugá. E seremonia akí ta marka apertura ofisial di e festividatnan. Di e manera akí, riba djasabra 6 di sèptèmber, Dia di Boneiru mes, ta surgi espasio na abundansia pa e festividat kultural grandi. Un dia yen di baile, músika, kuminda i enkuentro, kaminda nos komo pueblo ta bini huntu i selebrá nos identidat.
Konferensia di prensa – 28 di ougùstùs
Promé ku e siman di fiesta, riba djaweps dia 28 di ougùstùs nos ta organisá un konferensia di prensa. Durante e konferensia di prensa detayadamente nos lo kompartí programa di e festividatnan.
Selebrá huntu, krese huntu
Dia di Boneiru no ta solamente un dia di fiesta. E ta un momentu di reflekshon, konekshon i orguyo. E ta un dia kaminda nos ta brasa otro, kompartí nos balornan i wak huntu den direkshon di futuro.
Paso pa paso nos ta kana yega Dia di Boneiru.
Un dia riba kua huntu nos ta bisa:
Nos ta Boneiru.
