Interkambio kultural kombiná ku fiesta di barí 2022

Sekshon di Kultura, Arte i Literatura (SKAL) ta organisá un aktividat ku ta karga e nòmber “Interkambio Kultural, kombiná ku Fiesta di Barí 2022”. Interkambio Kultural A-B-C kombiná ku Fiesta di Barí 2022 ta tuma lugá dia 16 di desèmber benidero for di 7’or pa 12’or di anochi na Plasa Francisco “CHICU” Goeloe. E aktividat akí ta grátis pa públiko.

Ta trata aki di un interkambio kultural pa sera aña 2022 kaminda dos agrupashon musikal di nos hermana islanan Aruba i Kòrsou tambe lo partisipá. Boneiru, Aruba i Kòrsou ta disponé di hopi talento riba tur tereno i ta nos deber pa stimulá i duna espasio pa nos artistanan desaroyá pa medio di proyektonan pa elevá konosementu riba nan tereno.

Gobièrnu di Boneiru pa medio di su Sekshon di Kultura, Arte i Literatura (SKAL) ta lansando diferente proyekto genial i inovativo di manera ku ta krea espasio pa di tur manera stimulá i promové nos artistanan den tur sentido di palabra, pa por garantisá eksistensia i mantenshon di nos kultura.

Un invitashon ta bai na nos komunidat pa asistí na e Interkambio Kultural, kombiná ku Fiesta di Barí 2022. Sekshon di Kultura, Arte i Literatura (SKAL) ta deseá pueblo di Boneiru felis dianan di fiesta i un próspero aña 2023.