Promé ku e lansamentu, lo tin dos anochi di informashon, dia 9 di sèptèmber na Amboina i dia 17 di sèptèmber na Rincon. Durante di e anochinan aki lo splika kon e konsulta ta funshoná i ki apoyo ta disponibel Tur hende ta bon bini pa djòin e kombersashon.
Dikon esaki ta importante?
Salú seksual ta inkluí mas ku prevení malesa i embaraso no intenshonal so, e ta inkluí tambe libertat di eskoho, relashonnan seif, i rèspèt pa límite di otro. Nos ke krea un espasio kaminda tur hende por papia tokante salú seksual. Nos sa ku no ta tur hende tin akseso na kuido eksistente. P’esei, nos ta ofresé un alternativa aksesibel i anónimo. Bon informashon pa tur edat ta redusí e riesgo di malesanan transmití seksualmente i embaraso no intenshonal.
Un aserkamentu amplio pa salú seksual
E konsulta ta parti di Resilensia Kai i Lanta, e programa di Salubridat Públiko (GGD Boneiru) den kolaborashon ku Akseso i MHC, pa salú seksual, mental i prevenshon di adikshon. Esaki ta inkluí:
- “Mi futuro, mi eskoho konsiente” (Nu Niet Zwanger) pa prevení embaraso no intenshonal.
- Ekspanshon di e kantidat di mashinnan di bende kondon despues di un proyekto piloto eksitoso (ku mas ku 3.000 kondon bendí na 2024).
- Edukashon seksual pa hóben y formashon i guia di dosente i dunadó di kuido den e área aki.
Ku e aserkamentu amplio aki, GGD Boneiru ke yuda residentenan hasi eskohonan saludabel i konstruí un komunidat resiliente huntu.
Bo ke sa mas?
Asistí na e anochinan di informashon riba djamars 9 di sèptèmber na Sentro di Bario Amboina òf djárason 17 di sèptèmber na Rucardi Lounge (Kaya Orkidia 14 Rincon). Porta ta habri 6:30 PM. Pregunta? Manda un email na resilensiaggd@bonairegov.com.
