Dia 20 di yanüari 2025, e indikashon di área di riesgo di siguridat a kaduká. Despues di evaluashon i konsiderashon kuidadoso di parti di gezaghèber huntu ku fiskal mayó i hefe di kuerpo polisial, a disidí pa un biaha mas indiká e áreanan akí komo área di riesgo di siguridat.
Motibu pa e medida
E akshonnan ku a tuma te ku awor den e áreanan indiká, tabatin prinsipalmente un efekto preventivo. E akshonnan akí a kondusí na diferente detenshon i desalokashon di droga i diferente tipo di arma. Ku e hopi aktividatnan i eventonan ku ta tuma lugá den e periodo binidero, manera selebrashon di Karnaval i Dia di Rincon, ta nesesario pa tuma medidanan adekuá pa garantisá òrden públiko i siguridat.
Prolongashon di e indikashon
Ta prolongá indikashon di e áreanan di riesgo di siguridat pa e periodo di 21 di yanüari 2025 te ku 19 di mei 2025. E áreanan indiká ta keda meskos i ta lo siguiente:
- Un parti di Playa
- Un parti di Antriol Pabou
- Antriol Pariba
- Nikiboko
- Un parti di Nort’i Saliña
- Un parti di Tera Kòrá
Listramentu preventivo
Den e áreanan di riesgo di siguridat indiká, fiskal tin e outoridat pa emití un òrden pa listramentu preventivo. Esaki ta enserá ku den e áreanan akí por listra tur hende, sin ku un sospecho ta nesesario pa esaki.
Liña di tep anónimo
Nos apresio pa bo enbolbimentu komprobá ta grandi i esaki ta keda di importansia krusial pa éksito di e medidanan akí. Pa e motibu akí nos ta konta ku bo komprenshon i koperashon, pasobra solamente huntu nos por traha pa logra un Boneiru mas seif.
Bo tin informashon ku bo ke kompartí òf situashonnan sospechoso ku bo ke mèldu? E ora ei tuma kontakto ku polis via 715 8000 òf via e liña di tep anónimo 9310.
