Awe, 22 di mei, nos ta selebrá Dia Internashonal di Biodiversidat. E dia akí ta rekordá nos riba e rikesa di bida na mundu: for di mata i bestia te bakteria i beskein. Nos propio bienestar ta vinkulá estrechamente ku salú di e ekosistemanan akí. Hala rosea, kuminda, energia i asta nos remedinan ta sali for di naturalesa. “Nos ta biba di naturalesa”. Nos bida ta dependé kompletamente di ekosistemanan salú.
E desafionan ta grandi. Mundialmente ekspanshon urbano, deforestashon, kontaminashon, kambio di klima i espesienan invasivo ta kondusí na un redukshon di biodiversidat. Espesienan invasivo eksótiko ta espesienan di mata òf bestia for di otro áreanan ku ta hala nos propio espesienan un banda. Boneiru ta enfrentá desafionan komparabel.
Durante e añanan tras di lomba sierto matanan i palunan endémiko a bira mas skars pa motibu di entre otro kabritu i buriku ku ta kana lòs. Lionfish i palu di neem (neemtree) por ehèmpel por hala nos propio piskánan i matanan un banda. Kambio di klima mas frekuentemente ta okashoná ku nos koralnan ta blikia (coral bleaching), loke ta afektá nos refnan seriamente. Konstrukshon kantu di laman tambe tin influensia negativo riba ref di koral, entre otro pa motibu di e eroshon i e sobrefertilisashon ku esaki ta trese kuné.
Pa kombatí e pèrdidanan akí, kasi tur estado miembro di Nashonnan Uní a ekspresá e ambishon pa den kareda di aña 2030 rekuperá por lo ménos 30% di e áreanan di naturalesa dañá. Boneiru ta aportá na esaki pa medio di traha riba proyektonan pa rekuperashon di naturalesa den nos parkenan, rekuperashon di nos koralnan i palunan di mangel i pa fortifiká maneho di awa shushi i monitoreo di kalidat di awa.
E aserkamentu akí ta mishi ku nos tur. For di gobièrnu nashonal i gobièrnu lokal te empresarionan, organisashonnan di naturalesa, dosentenan, investigadónan i suidadanonan. Diputado Anjelica Cicilia ta pone énfasis riba importansia di esfuersonan lokal. “Kada akshon ta konta ora ta trata di protekshon di nos biodiversidat. Pa medio di traha huntu riba protekshon di nos naturalesa, no solamente nos por konservá nos bunita naturalesa, pero tambe nos por salbaguardiá un futuro saludabel pa Boneiru.”
