Siman pasá maneho di krísis i komunikashon di krísis tabata sentral durante di un programa intensivo na Kòrsou. Mas ku shen manehadó di krísis i spesialista di krísis di tur parti di Reino a partisipá na e di seis edishon di Siman di maneho di Krísis i di dos edishon di Siman di Komunikashon di Krísis.
Banda di e paisnan manera Hulanda, Kòrsou, Aruba i Sint Maarten, Hulanda Karibense tambe tabata bon representá dor di kordinadónan di krísis i spesialista di komunikashon di entidatnan públiko di Boneiru, Sint Eustatius i Saba, meskos tambe spesialista di komunikashon di e departamentu di komunikashon di Rijksdienst Caribisch Nederland.
E enkuentro a ofresé un plataforma balioso pa fortifiká lasonan mutuo, hasi interkambio di konosementu i eksperensia i siña di otro su manera di traha. Tambe e partisipantenan a papia di nan ambishon pa intensivá e kolaborashon, di manera ku nan por aktua mas efektivo den futuro ora tin insidente, kalamidat i krísis.
