For di 1 di yanüari 2026 tin kondishon nobo pa hasi petishon pa Kontribushon Hür Partikular. Kontribushon Hür Partikular ta e kontribushon ku famianan ku un entrada abou te mediano por pidi ora nan ta hür un kas den sektor privá. E hür no tin mag di ta mas haltu ku $ 979,00 pa luna, sin gastu di servisio. E kondishonnan nobo ta na vigor for di 1 di yanüari 2026 pa hende ku ta hasi petishon pa promé biaha. E kondishonnan nobo pa Kontribushon Hür Partikular ta na vigor for di 1 di yüli 2026 pa hende ku aña pasá a risibí un prolongashon di Kontribushon Hür Partikular.
Kondishonnan nobo:
- Kontribushon propio pa tur hende ku ta hasi petishon
Tur hürdó ku ta hasi petishon pa Kontribushon Hür Partikular, ta paga un kontribushon propio. E kontribushon propio ta dependé di entrada di e hende ku ta hasi petishon. Tur luna e hende ku ta hasi petishon ta transferí e kontribushon propio akí pa kuenta di banko di e doño di kas.
Kontribushon den kaso di sueldo mínimo òf mas abou
Un hende ku ta hasi petishon i tin sueldo mínimo òf un entrada mas abou ku sueldo mínimo, ta paga $ 185,00 komo kontribushon propio. E hende ku ta hasi petishon ta transferi su kontribushon propio di $ 185,00 tur luna via banki riba kuenta di e doño di kas.
Kontribushon den kaso di entrada mas haltu ku sueldo mínimo
Pa un hende ku ta hasi petishon i ku tin un entrada mas haltu ku sueldo mínimo, nan ta determiná e kontribushon a base di un tabèl.
- Sinku aña tras di otro sin interupshon inskribí na Registro Sivil
Solamente hende ku ta por lo ménos sinku aña tras di otro sin interupshon inskribí na Registro Sivil i ta biba na Boneiru, tin derecho riba Kontribushon Hür Partikular.
E kondishon di sinku aña sin interupshon akí ta konta solamente pa hende ku ta hasi petishon pa promé biaha. Hende ku promé ku 1 di yanüari 2026 ya kaba tabata risibí Kontribushon Hür Partikular i ku no ta kumpli ku e término di sinku aña akí, ta mantené nan derecho riba Kontribushon Hür Partikular te 1 di yüli 2026.
Aparte di esaki e kondishon akí no ta konta tampoko pa yunan di nos isla: e no ta konta pues pa hende ku a nase na Boneiru òf ku tin un mayor ku a nase na nos isla.
- Entrada di tur hende di 18 aña bai ariba den kas, kontá huntu
Pa determiná entrada di e hende ku a hasi petishon pa Kontribushon Hür Partikular, nan ta konta tur entrada huntu di e personanan di 18 aña bai ariba ku ta biba den kas serka e hende ku a hasi petishon. E total di e entradanan akí huntu, no tin mag di ta mas haltu ku $ 4633,00 bruto. Un hende ku ta hasi petishon no tin derecho riba Kontribushon Hür Partikular si e kontribushon propio a base di entrada ta mas haltu ku hür di e hende ku ta hasi petishon.
Den e areglo di Kontribushon Hür Partikular no tin kambio den e siguiente partinan:
- Hür di e hende ku ta hasi petishon tin mag di ta maksimalmente $ 979,00, sin gastu di servisio.
- E doño di kas ta haña un prima di $ 50,00 pa luna.
- E hürdó i e doño di kas ta entregá e petishon huntu.
Mester entregá e siguiente dokumentunan huntu ku e petishon pa Kontribushon Hür Partikular:
- Sédula di e hürdó
- Sédula di e doño di kas
- Kòntrakt di hür ( minimalmente 3 luna bieu)
- Komprobante di pago di hür (minimalmente 3 estado di kuenta di banko òf resibu)
- Prueba di tur fuente di entrada ku bo a indiká (por ehèmpel kòntrakt di trabou, spesifikashon di penshun òf karta) i prueba ku a risibí esakinan (komprobante òf estado di kuenta di banko) di e hürdó i tur otro hende di 18 aña bai ariba ku ta biba na e adrès ei i ku tin un entrada
- Deklarashon di lugá di biba na Registro Sivil di e hürdó
Pa mas informashon tokante Kontribushon Hür Partikular:
aportehurpartikular@bonairegov.com.
Whatsapp (+599) 777 2299), i telefòn 717 2211 departamento di Kontribushon Hür Partikular.
