Na kuminsamentu di luna di yanüari 2026 tur doño registrá di un vehíkulo ku number ta risibí e papel di kobransa (aanslagbiljet) pa Impuesto di Vehíkulo di Motor 2026. Esaki ta konta pa entre otro; outo, motosaikel, skuter, trùk i otro vehíkulonan. Un vehíkulo no ta riba bo nòmber mas pa motibu ku bo a bend’é, e ta dañá òf bo no ta us’é mas? E ora ei entregá e plachinan di number promé ku 30 di desèmber 2025 pa evitá ku bo tin ku paga impuesto pa aña 2026.
Importante pa sa
Outomátikamente ta kobra impuesto pa e aña nobo di impuesto riba plachi di number ku bo no a entregá promé ku 30 di desèmber 2025. Esaki ta sosodé tambe ora ku e vehíkulo no ta den bo poseshon mas, por ehèmpel pa motibu ku bo a bandoná nos isla. Hende ku obligashon di paga impuesto mes ta keda responsabel pa entregá e plachinan di number.
Kon bo ta entregá bo plachinan di number?
Bai na departamento di Finansa i einan bo ta yena e formulario di entrega. Esaki ta konta tambe ora e plachinan ta perdí òf hòrtá. E servisio akí ta situá na Kaya Industria Pariba 28.
Bin ku lo siguiente (si esaki ta aplikabel):
- Un prueba bálido di legitimashon (sedula, pasport)
- Ekstrakto (uittreksel) di Kámara di Komèrsio (pa empresa – no mas bieu ku 6 luna)
- Deklarashon di kanselashon (si esaki ta disponibel)
- Apoderashon (vòlmagt) i kopia di sédula di e doño, si un otro hende ta entregá e plachinan di number
- Prosèsverbal den kaso di pèrdida òf ladronisia di e plachinan di number
Pa pregunta tokante Impuesto di Vehíkulo di Mortor, habitantenan por tuma kontakto via: belasting-olb@bonairegov.com | 717 5330 – ekstenshon 5326.
