Dia 26 di novèmber 2021 Korte Supremo (Hoge Raad) a stipulá den e Aresto Didam (ECLI:NLHR:2021:1778) ku instansianan di gobièrnu ta obligá pa hasi un anunsio públiko ora nan tin intenshon pa emití bienes inmóbil. Entidat Públiko Boneiru ta sigui e instrukshon akí pa medio di emití dos parsela riba tereno di gobièrnu pa un proyekto di kuido di hende grandi.
Dos parsela disponibel pa ‘Stichting Zorg en Welzijn Groep’ i Cocari II
Entidat Públiko Boneiru tin intenshon pa pone dos parsela, inkluso e edifisio di ‘Magasina di Rei Amboina’, disponibel na ‘Stichting Zorg en Welzijn Groep’ (ZW-Groep) i Fundashon Cocari II. E parselanan akí ta situá den e área entre Kaya Mendelssohn, Kaya Anna, Kaya Calixta i Kaya Sonmontuno.
Motivashon pa emishon kaminda tin un kandidato so i no ta hasi uso di un prosedura di selekshon públiko
Entidat Públiko Boneiru ta di opinion ku no tin mester di ofresé e espasio pa kompetensia pa medio di un prosedura di selekshon den kaso di intenshon di emishon na èrfpagt ku ta deskribí den e aresto di Korte Supremo di 26 di novèmber 2021, pa motibu ku a base di kriterionan ophetivo, kontrolabel i rasonabel pa emishon di e tereno ku e edifisio eksistente, solamente e kandidato aktual ta bini na remarke. Pa e argumentashon kompleto ta referí na e publikashon. Por haña henter e publikashon di e intenshon riba nos wèpsait via https://bonairegov.com/pa/habitante/anunsio-ro
Kolaborashon ku Ministerio di Salubridat Públiko, Bienestar i Deporte
ZW-Groep a haña e tarea serka Ministerio di Salubridat Públiko, Bienestar i Deporte pa elaborá e plannan pa fasilidatnan di kuido di hende grandi na Boneiru. Aktualmente huntu ku Cocari II, ZW-Groep ta trahando riba e proyekto importante akí pa komunidat boneriano. E proyekto akí ta karga e nòmber ‘Nos Bario’.
Reakshon i término pa reakshoná
Si bo ta di opinion ku a base di e kriterionan formulá, manera menshoná den henter e publikashon, bo tambe mester bini na remarke pa emishon di e tereno akí ku e edifisio eksistente (Magasina di Rei Amboina) òf si bo no ta di akuerdo ku e intenshon akí pa emishon di tereno, e ora ei dentro di un término di 20 dia kalendario despues di publikashon bo tin ku duna esaki di konosé pa medio di entamá un wisio sumario na Korte di Promé Instansia. Alabes bo tin ku manda un kopia digital di e dagfar na directie_ro@bonairegov.com. Menshoná tambe referensia i título di e publikashon.
Pa pregunta òf remarke por tuma kontakto ku direktorado di Planifikashon i Desaroyo via directie_ro@bonairegov.com.
