Anunsio R&O

Intenshon pa emishon di vários parsela di tereno di gobièrnu riba tereno di LVV pa empresarionan agríkola

Dia 26 di novèmber 2021 Korte Supremo (Hoge Raad) den e aresto Didam (ECLI:NL:HR:2021:1778) a dikta sentensia ku un instansia di gobièrnu, teniendo kuenta ku e prinsipio di igualdat, tin e obligashon pa hasi un anunsio públiko ora ku nan tin intenshon di enagená un propiedat inmóbil òf sera un akuerdo pa emishon di propiedatnan inmóbil i derechonan real.

Ku e publikashon akí entidat públiko Boneiru ta duna ehekushon na e aresto Didam di Korte Supremo di 26 di novèmber 2021 (ECLI:NL:HR:2021:1778).

Intenshon:

Entidat Públiko Boneiru tin intenshon pa riba e tereno di LVV, situá na Kaminda Lagun, pone vários parsela di tereno agríkola di gobièrnu na disposishon di empresarionan agríkola.

• Ubikashon: tereno di LVV di Entidat Públiko Boneiru, situá na Kaminda (e tereno ta ilustrá den e kuadro blou riba e mapa abou).
• Kiko lo tuma luga? Den e tereno aki, tres área grandi a wòrdu designá (wak mapa abou: Área 1, Área 2 i Área 3). Den kada un di e áreanan aki, vários tereno mas chikí ta wòrdu emití.

Intenshon pa emishon di vários parsela di tereno di gobièrnu riba tereno di LVV pa empresarionan agríkola

E tereno di LVV ta trata di un área di mas òf ménos 50 hektar ku a keda spesialmente indiká pa promoshon di agrikultura i krio di bestia. E tereno akí ta forma parti di e ophetivo di maneho mas amplio di Entidat Públiko Boneiru pa stimulá produkshon lokal di kuminda i pa fortifiká Boneiru su independensia ekonómiko.

E parselanan di tereno di gobièrnu tin e destinashon Agríkola – Kunuku. Esaki ta nifiká ku nan ta destiná pa aktividat agríkola riba eskala chikitu, manera agrikultura, krio di bestia i akuakultura.

Na momentu di emishon di e terenonan akí ta duna prioridat na empresanan ku ta aktivo den hortikultura, kultivo di fruta, krio di bestia òf produkshon di kuminda pa bestia na Boneiru. Meta di esaki ta pa promové suministro di kuminda lokal i oumentá outosufisiensia di nos isla. Partidonan riba merkado cu ta spesialisá den esaki, por inskribí pa un parsela.

Enfoke di e prosedura di selekshon ta pa na un manera kuidadoso i hustu duna vários empresario agríkola  oportunidat pa realisá nan plannan. Un kondishon pa esaki ta ku e aktividatnan proponé riba e tereno ta kuadra ku e kategorianan agríkola menshoná: hortikultura, kultivo di fruta, krio di bestia òf produkshon di kuminda di bestia.

E puntonan di salida pa inskripshon di un inisiativa ta lo siguiente:

• Enfoke agríkola: E inisiativa mester ta enfoká riba hortikultura, kultivo di fruta, krio di bestia òf produkshon di kuminda di bestia na Boneiru.
• Stimulá outosufisiensia: E aktividatnan proponé mester kontribuí na produkshon lokal di kuminda i redukshon di dependensia di importashon.
• Uso sostenibel di e tereno: E operashon empresarial no mester ta dañino pa medio ambiente i e mester tene kuenta ku kalidat di suela, uso di awa i biodiversidat.
• Faktibilidat ekonómiko: E inisiativa mester ta finansieramente realístiko i viabel, ku un plan di negoshi klarito.
• Integrashon den e paisahe: Desaroyo di e parsela mester kuadra ku e destinashon Agríkola - Kunuku i no mester tin un impakto negativo riba e bisindario.
• Obligashon pa desaroyo: Dentro di un término predeterminá mester kuminsá ku e aktividatnan agríkola.

Kriterionan pa selekshon:

E prosedura di selekshon ta transparente i ta brinda un oportunidat hustu na tur e empresarionan agríkola ku kualifiká pa un parsela. Mas aleu e inisiadó mester tene kuenta ku e siguiente aspektonan na momentu di inskripshon:

• Sinkronisashon ku plannan di LVV: E inisiativa mester kuadra ku e vishon di desaroyo i e ophetivonan di e  Maneho di Agrikultura, Krio di Bestia i Piskamentu (LVV) di Entidat Públiko Boneiru.
• Funshon agríkola: E inisiativa mester konektá ku e aktividatnan agríkola deskribí akí riba, manera hortikultura, kultivo di fruta, krio di bestia i produkshon di kuminda di bestia.
• Kalidat espasial: E operashon empresarial mester kuadra ku e destinashon Agríkola – Kunuku i kontribuí na un uso responsabel i efisiente di e tereno ku ta disponibel.
• Sostenibilidat: Mester ehekutá e inisiativa den un forma ku no ta dañino pa medio ambiente, i ku atenshon pa uso di awa, maneho di suela, suministro di energia i prosesamentu di shushi na un manera sostenibel.
• Impakto riba naturalesa i bisindario: Mester identifiká e impakto ku e inisiativa tin riba e ambiente di biba rònt di esaki, i mester limitá eventual konsekuensianan negativo.
• Balor agregá pa sektor agríkola: Kon e inisiativa ta aportá na fortifikashon i diversifikashon di produkshon lokal di kuminda i sektor di agrikultura?
• Aporte ekonómiko: E inisiativa mester aportá na empleo i desaroyo ekonómiko na Boneiru.

Banda di esaki na momentu di evaluashon di un inisiativa ta pone e siguiente aspektonan tambe den balansa:

• Preferensia pa empresarionan agríkola lokal: E empresarionan ku inskribí ta haña preferensia si nan ta establesé na Boneiru.
• Faktibilidat finansiero ekonómiko: E inisiativa mester ta finansieramente ehekutabel i rèndabel na un manera duradero.
• Eksperensia i ekspertisio: Preferibelmente e empresario ku inskribí ta disponé di eksperensia komprobabel ku operashon empresarial agríkola i ku kreashon i ehekushon di proyektonan komparabel.

Término pa reakshon:

Por entregá inisiativa na Entidat Públiko Boneiru via directie_ro@bonairegov.com. Seguidamente Entidat Públiko Boneiru lo tuma kontakto ku e inisiadónan tokante kontinuashon mas aleu di e prosedura.

Den kaso ku relashoná ku e publikashon akí ainda bo tin pregunta i/òf remarke, e ora ei bo por tuma kontakto ku direktorado di Planifikashon i Desaroyo, departamento di Agrikultura, Krio di Bestia i Piskamentu (LVV) via directie_ro@bonairegov.com.