For di komienso di e ‘pilot’ Kontribushon Hür Partikular (Bijdrage Particuliere Verhuur - BPV) ku a ranka sali dia 1 di mart 2022, hopi petishon a drenta serka Entidat Públiko Boneiru. Di e petishonnan akí 90% a keda aprobá. Mayoria petishon a keda prosesá dentro di un luna.
E Kontribushon Hür Partikular ta un kompensashon di parti di gobièrnu pa redusí e gastu mensual di hür di hendenan ku un entrada abou ku ta hür kas den sektor privá. E impakto pa e grupo akí ta grandi: e promedio (di redukshon di hür) pa kada kas di famia ta $ 304,- pa luna. ‘Sinembargo, te ku awor no tur hende ta entregá un petishon. Pa e motibu akí nos ta bai intensivá e komunikashon i dunamentu di informashon tokante e ‘pilot’ den e periodo binidero’, segun Silvana Janga di Direktorado di Komunidat i Kuido.
Direktorado di Komunidat i Kuido a entregá e evaluashon intermedio di e ‘pilot’ na minister Hugo de Jonge durante su bishita di trabou na Boneiru. Na e okashon ei a palabrá entre otro ku Entidat Públiko Boneiru den koperashon ku Ministerio di Asuntunan Interno i Relashonnan den Reino lo solushoná e difikultatnan ku ta bini dilanti for di e ‘pilot’. Na mes momentu ta di importansia pa enfatisá ku e Kontribushon Hür Partikular no por solushoná tur kestion relashoná ku e problemanan riba merkado di bibienda na Boneiru.
E Kontribushon Hür Partikular ta un instrumento ku ta enfoká riba redukshon di e konsekuensianan sosial negativo di e falta agudo di kas di hür sosial. E minister i Entidat Públiko Boneiru ta di akuerdo ku otro ku un aserkamentu integral ta nesesario, ku konstrukshon di bibienda sosial nobo komo prioridat urgente i uso di instrumentonan hurídiko i instrumentonan a base di maneho i otro instrumentonan pa kombatí desaroyonan inaseptabel ku tin di aber ku skarsedat riba merkado di bibienda.
Por haña mas informashon tokante e Kontribushon Hür Partikular riba nos wèpsait: https://bonairegov.com/inwoners/bpv òf pa medio di yama e number di telefòn +599 717 2211. Pasa personalmente na Direktorado di Komunidat i Kuido tambe ta posibel.
