Resientemente e promé enkuentro di Federashon a tuma lugá, kaminda representante di diferente federashon i organisashon di deporte a bini huntu pa deliberá tokante futuro di deporte na Boneiru.
Durante e enkuentro a papia ampliamente tokante organisashon di e próksimo Sports Expo i Bonaire International Sportsweek. E federashonnan a deliberá tokante kon nan por traha huntu pa logra un ehekushon eksitoso di e eventonan grandi di deporte akí, kaminda interakshon i kombinashon entre e diferente tipo di deporte lo hunga un ròl importante. Banda di esaki a dediká atenshon tambe na kon e federashonnan riba término largu tambe por traha mas mihó huntu pa organisá i fortifiká aktividatnan di deporte den un forma struktural.
Un otro tópiko importante tabata fortifikashon di organisashonnan di deporte na nos isla. A papia tokante e posibilidatnan pa kuminsá ku mas proyekto konhunto, kaminda e federashonnan por sostené i fortifiká otro. A anunsiá tambe ku Boneiru a haña sinku Doping Control Officers (DCO’s) nobo, loke ta un paso importante pa salbaguardiá deporte honesto i limpi na nos isla.
Banda di esaki a papia tokante kon organisashonnan di deporte por enbolbí nos komunidat lokal mas mihó ainda. Akí a wak den direkshon di e oportunidatnan ku AKSESO ta ofresé ku uso di e Sentronan di Bario komo sitio pa deporte i moveshon. Esaki ta brinda posibilidatnan nobo pa aktivá nos habitantenan den un forma aksesibel i hasi partisipashon na deporte mas grandi na nos isla.
E enkuentro tabata un paso importante den desaroyo mas aleu di deporte na Boneiru. Pa medio di traha huntu i uni forsa, federashonnan i organisashonnan di deporte por fortifiká e klima di deporte na nos isla i laga esaki krese na un manera duradero. A pone énfasis riba kreashon permanente di inisiativanan konhunto i riba un strategia di término largu pa desaroyo di deporte na Boneiru, pa asina sigurá éksito den futuro.
