Riba djaweps 20 di febrüari 2025 lansamentu ofisial di Mesa di Klima Boneiru a tuma lugá durante un konferensia di kick-off bon bishitá den Corallium Hotel & Villa’s. Entre e presentenan tabata gezaghèber John Soliano, diputado Anjelica Cicilia, diputado Nina den Heyer i miembronan di Konseho Insular. Enfoke di e enkuentro, ku a tuma lugá di 18:00 or pa 20:00 or, tabata pa krea konsientisashon tokante e konsekuensianan di kambio di klima pa Boneiru.
Mesa di Klima Boneiru ta trese habitantenan, empresanan, organisashonnan sosial i gobièrnu huntu pa pensa solushon pa e desafionan di kambio di klima ku ta oumentando. Durante e enkuentro e presentenan a haña informashon tokante e efektonan internashonal, regional i lokal di kambio di klima i nan a haña oportunidat pa yuda pensa aktivamente tokante Boneiru su futuro.
Un programa fasinante ku orador inspirativo
E programa a kuminsá ku un mensahe di video di e Enviado di Klima sr Jaime de Bourbon de Parme. Despues a sigui un palabra di bon biní i un splikashon di e proseso di Mesa di Klima Boneiru, di parti di e presidente sr Reynolds (Nolly) Oleana. Seguidamente e oradornan invitá, entre otro e Hefe di Meteorologia Operashonal sra Pédzi V.J. Girigori di Servisio Meteorológiko Kòrsou, i e representante di hóben sr Anthony E. Sion Janga a kompartí konosementu tokante e impakto di kambio di klima i e ròl di nos komunidat den hañamentu di solushon.
Un di e puntonan kulminante di e anochi tabata e seshon interaktivo ‘Soña tokante Boneiru 2050’, kaminda a invitá e presentenan pa kompartí nan vishon riba un Boneiru resiliente pa klima. Banda di esaki sr Arxen Alders, mènedjer di ‘Governance & Sustainability’ na Grant Thornton Bonaire, a tene un presentashon tokante e konsekuensianan di kambio di klima pa Boneiru. Esaki a keda komplementá ku un presentashon tokante inisiativanan ku ta andando na Boneiru, di parti di sr Maurice Adriaens, kende ta entre otro kordinadó di klima na Entidat Públiko Boneiru.
Kompetensia di lema pa skol
Den preparashon pa e kick-off a organisá un kompetensia di lema entre e skolnan na Boneiru. A reta e alumnonan pa pensa un lema koutivante ku ta reflehá mishon di Mesa di Klima Boneiru. SGB, skol básiko De Pelikaan i skol básiko Aquamarin a manda nan proposishonnan aden. Finalmente nan a saka skol básiko De Pelikaan komo ganadó ku e lema: ‘Nos isla, nos responsabilidat’. E lema ta reflehá e responsabilidat kompartí di henter nos komunidat pa kontribuí na un Boneiru resiliente pa klima. Dentro di poko e skol ku a gana ta risibí su premio komo rekonosimentu pa su aporte na konsientisashon relashoná ku kambio di klima.
Planta un palu, hasi Boneiru mas bèrdè
A sera e anochi ku un palabra final di parti di diputado Anjelica Cicilia, den kua el a suprayá ku komo komunidat nos tin ku traha huntu pa atendé ku e desafionan di kambio di klima. Seguidamente e presentenan a haña un palu chikitu di fruta endémiko protehá, esta un palu di taki, pa bai planta na kas i di e manera ei kontribuí na un Boneiru mas bèrdè.
E Grupo di Proyekto Mesa di Klima Boneiru a invitá tur hende pa partisipá na e futuro kòmbersashonnan di mesa di klima i traha konhuntamente pa logra un Boneiru resiliente pa klima.
Mas informashon:
Pa pregunta i informashon adishonal, por manda un imeil na info@klimaattafel-bonaire.com.
