Kolegio Ehekutivo di Boneiru ta poniendo pasonan ambisioso den direkshon di un maneho di shushi mas sostenibel i un ambiente di biba mas salú pa tantu nos habitantenan komo nos bishitantenan. Ku un vishon inovativo riba shushi i investigashon pa loke ta trata un sitio stratégiko pa kolektá i prosesá shushi, nos isla ke atendé na un manera struktural ku e problema di shushi i stimulá ekonomia sirkular.
Ekonomia sirkular i prosesamentu moderno di shushi
Pa redusí e volúmen di shushi i promové reuso, Kolegio Ehekutivo a duna enkargo pa formulá un vishon riba shushi. E vishon akí ta enfoká riba un aserkamentu struktural i sirkular, kaminda ta prosesá shushi na un manera moderno. Segun ekspektativa ta presentá e konsepto ku Royal Haskoning DHV ta formulá, den e promé kuartal di aña 2025.
Aserkamentu struktural di e problemátika di shushi
Boneiru ta konfrontando un problema struktural di shushi, debí tambe na importashon di produkto di konsumo i un falta di infrastruktura adekuá pa resiklahe. E poblashon ku ta kresiendo i e oumento di fluhonan di shushi ta kondusí na mas shushi (riba kaya), ku konsekuensianan negativo pa hende i medio ambiente. Un aserkamentu integral i konhunto ku enbolbimentu di tur stakeholder ta esensial pa hasi nos isla mas limpi i mas sostenibel.
Investigashon di rekohementu stratégiko di shushi
Banda di e vishon riba shushi, Kolegio Ehekutivo ta investigá tambe e sitionan aktual i e sitionan alternativo pa rekohementu i prosesamentu di shushi. Dia 26 di febrüari último a duna enkargo pa identifiká sitionan alternativo, ku atenshon spesial pa un posibel sitio nobo na kosta wèst di nos isla, den bisindario di i pegá ku haf di BOPEC. E sitio akí mester kontribuí na un logístika efisiente, un redukshon di riesgo i transporte seif di produktonan residual pafó di áreanan residensial.
Espektativa pa bentahanan i benefisionan sekundario
Ku e vishon stratégiko riba shushi i un sitio moderno pa prosesamentu, por realisá e siguiente bentahanan:
- Prosesamentu sostenibel di shushi: Stimulashon di resiklahe i reuso di material.
- Redukshon di kontaminashon di medio ambiente: Riesgo mas abou di salú pa nos habitantenan i un medio ambiente mas limpi.
- Logístika mehorá: Rekomentu i prosesamentu mas efisiente di produktonan residual.
- Normanan internashonal: Kumplimentu ku legislashon internashonal di medio ambiente.
- Benefisionan sekundario: Posibilidat potensial pa produkshon di koriente.
Un Boneiru resiliente pa futuro
E inisiativanan di Kolegio Ehekutivo ta aksentuá Boneiru su kompromiso ku un isla resiliente pa futuro i sostenibel. Pa medio di un aserkamentu integral di fluhonan di shushi i un vishon renobá riba maneho di shushi, nos ta trahando riba un ambiente di biba mas limpi i un uso mas efisiente di materia prima. Investigashon adishonal lo hasi posibel pa Kolegio Ehekutivo tuma mas desishon i pone pasonan konkreto den direkshon di un ekonomia sirkular.
