Entidat Públiko Boneiru ta reforsá su tim di maneho ku nombramentu di señor Edwin Galle komo Hefe di Departamento di Finansa. Dia 15 di yanüari 2026 e ta kuminsá ofisialmente den e funshon akí.
Despues di un periodo den kua e kònsùltent señor Reginald Carolina a yena e funshon akí temporalmente, durante e último lunanan Entidat Públiko Boneiru a pasa den un proseso intensivo di reklutashon i selekshon. E trayekto akí a kondusí na nombramentu di señor Galle, kende a keda selektá ku konvikshon i entusiasmo pa duna guia na departamento di Finansa.
Ya pa 9 aña kaba Edwin ta bishitá Boneiru frekuentemente i for di sèptèmber 2024 e ta biba na Boneiru. E ta disponé di hopi eksperensia i konosementu profundo komo direktor finansiero, ekonomista empresarial i Register Controller (RC). Anteriormente el a ehersé vários funshon di hefe na kompanianan internashonal manera KLM i Heineken i na Mental Health Caribbean na Boneiru. Pa medio di su eksperensia di hopi aña den diferente funshon ehekutivo, e tin bon konosementu di operashon empresarial munisipal i di kolaborashon entre empresanan i gobièrnu. E ta enfoká riba inovashon, digitalisashon i mehorashon di efisiensia den kombinashon ku un aserkamente ku enfoke riba hende.
Ku su nombramentu, Entidat Públiko Boneiru ta spera di duna un impulso fuerte na profeshonalisashon mas aleu i fortifikashon di e organisashon finansiero.
Sekretario Insular Christopher Frans:
“Nos ta sumamente kontentu ku nombramentu di Edwin. Su eksperensia amplio, su konosementu i su estilo di liderazgo konektivo ta kuadra ekselentemente ku nos ambishonnan. Nos ta spera un kolaborashon plasentero i eksitoso.”
Diputado Anthony Weber:
“Ku su eksperensia, sigur Edwin ta un atkisishon balioso pa departamento di Finansa i pa Entidat Públiko Boneiru den su totalidat. Mi ta kontentu ku awor nos tin un kara fiho pa e tim i mi ta spera un kolaborashon plasentero.”
