Kolegio Ehekutivo di Entidat Públiko Boneiru (OLB) e siman akí a ekspresá su apresio profundo pa e personal di SELIBON. Den un mensahe personal pa e trahadónan, Kolegio Ehekutivo a enfatisá ku e esfuerso di e tim, spesialmente bou di e sirkunstansianan desafiante di e último añanan, ta di balor inestimabel pa e isla. Komo un gesto tangibel di gratitut, a entregá un pakete di fin di aña na tur trahado.
Segun Kolegio Ehekutivo, e trahadónan den maneho di sushi ta forma e wesu di lomba di komunidat boneriano. Apesar di un situashon di trabou hopi biaha difísil i medionan limitá, e personal di SELIBON a sigi perkurá dia aden dia afó pa higiena i habitabilidat di nos isla. "Sin nan esfuerso inkansabel, e salubridat públiko i e bunitesa natural di Boneiru lo tabata na peliger. Nan trabou ta esensial i meresé nos rèspèt" segun diputado Clark Abraham.
Invershonnan den futuro
Kolegio Ehekutivo ta rekonosé ku den e último periodo a pidi hopi di e forsa i resistensia di e personal. P’esei a skohe un kaminda kla pa hasi SELIBON finansieramente i operashonalmente salú atrobe. Manera a anunsiá anteriormente, OLB a hasi e promé invershonnan nesesario e aña akí. Tambe den e añanan binidero Kolegio Ehekutivo lo sigi invertí den e maneho di e empresa i den material.
E meta di e invershonnan akí ta dòbel: optimalisá e servisio na e siudadano i mehorá e kondishonnan di trabou. "E personal ta sentral den e renovashon akí. Nan mester por hasi nan trabou ku material moderno i den un ambiente sigur ku ta hustifiká nan fishi i abilidat."
Apresio den echo
Banda di e invershonnan struktural den e empresa, Kolegio Ehekutivo tabata deseá di gradisí e trahadónan tambe na un manera personal pa nan perseveransia durante e aña ku a pasa. Komo muestra di apresio pa nan trabou duru, a entregá un pakete di fin di aña na tur trahadó.
Kolegio Ehekutivo ta konkluí ku un bista yen di speransa riba futuro: "Nos ta sigi konta riba e pashon di e trahadónan di SELIBON. Huntu, ku rèspèt mutuo i e invershonnan nesesario, nos ta traha na un Boneiru mas bunita, mas limpi i mas mihó."
