Den luna di febrüari 2025 e proyekto “Prekario” ta ranka sali. E inisiativa akí, bou di guia di Direktorado di Supervishon i Mantenshon di Lei (DTH), tin komo meta pa kombatí uso ilegal di tereno di gobièrnu i pa tene nos espasio públiko seif i habitabel pa habitantenan i bishitantenan di nos isla. E tópiko Prekario ta un parti importante di e akuerdo di ehekushon 2025 di Direktorado di Supervishon i Mantenshon di Lei i e ta keda ehekutá den kolaborashon ku Direktorado di Planifikashon i Desaroyo (DRO), Asuntunan Hurídiko i General i Kuerpo Polisial Hulanda Karibense (KPCN).
Bèkgrount i legislashon
A base di artíkulo 9 di e Ordenansa General di Polis i artíkulo 2,6 insiso 1 c di e Lei Bibienda Públiko, Ordenamentu Teritorial i Maneho di Medio Ambiente BES, ta prohibí pa sin pèrmit di e outoridat kompetente pone opheto manera stul, mesa, bòrchi di propaganda, baki di mata, baranka di piedra i similar riba asera òf kantu di kaminda. E ophetonan ta sin pèrmit riba espasio públiko, loke no solamente por redusí siguridat i aksesibilidat, pero na mes momentu e ta desbentahoso tambe pa e bista turístiko. A bini ku e proyekto Prekario pa atendé ku e uso ilegal akí di tereno di gobièrnu i pa sòru pa tur hende kumpli estriktamente ku regla.
Área di enfoke
Durante e último añanan Boneiru a eksperensiá un kresementu fuerte di su poblashon, loke a bai kompañá pa un ekspanshon di bida empresarial, prinsipalmente den sentro di Playa. Pa e motibu akí tantu doñonan di tienda i hóreka komo habitantenan di e área, kada biaha ta hasi mas uso di tereno di gobièrnu. Kolegio Ehekutivo ke sòru pa tur empresa ta haña un trato igual i ku ningun hende no ta haña un trato preferensial.
Proyekto di mantenshon di lei Prekario
Den e promé fase, e proyekto Prekario ta ranka sali den sentro di Playa i e áreanan rònt di esaki. E enfoke ta riba doñonan di kas, edifisionan di ofisina, establesimentunan di hóreka i tienda ku ta aktua en pugna ku e legislashon i regulashon vigente relashoná ku Derecho di Prekario. E meta ta pa stimulá komportashon di kumplimentu serka empresanan i habitantenan i na mes momentu kontribuí na un ambiente ordená, seif i aksesibel.
Ta supliká empresanan i habitante urgentemente pa promé ku inisio di e proyekto, kita tur opheto ku ta poné sin pèrmit for di riba asera i kantu di kaminda i hasi petishon pa e pèrmit nesesario pa prekario. Por hasi esaki den un forma simpel via wèpsait di Entidat Públiko Boneiru, bou di e ‘tab’ “pèrmit”.
Konsekuensia di inkumplimentu
Den kaso ku empresanan òf individuonan no ta kumpli ku lei, lo apliká instrumentonan di mantenshon di lei. Esaki por kondusí na kitamentu di e ophetonan i imponementu di but. Por rekuperá e gastunan di e forma di mantenshon di lei akí for di esun ku ta violá lei.
Yamada pa koperashon
Entidat Públiko Boneiru ta hasi un yamada riba tur hende pa tuma nan responsabilidat i sòru pa espasio públiko keda seif i aksesibel pa tur hende. Pa mas informashon tokante e proytekto Prekario, e lei, e pèrmitnan i e proseso pa hasi petishon, bo por akudí riba wèpsait di Entidat Públiko Boneiru, www.bonairegov.com òf bo por tuma kontakto ku Direktorado di Supervishon i Mantenshon di Lei via directie_th@bonairegov.com òf via e number di telefòn: +599 715 – 5330.
Huntu nos por sòru pa un Boneiru ordená, seif i habitabel.
