Djaluna tras di lomba e diputadonan Nina den Heyer i Anjelica Cicilia tabatin un enkuentro spesial ku e kantantenan hóben di tumba di Boneiru. E hóbennan talentoso akí e aña akí a partisipá na Festival di Tumba Hubenil i loke nan a eksperensiá, nan a kompartí ku e diputadonan.
A papia tokante eksperensianan i puntonan di mehorashon
Durante e kòmbersashon e hóbennan a konta tokante tur kos ku nan a pasa ‘den rònt di e festival. Nan a papia tokante e ensayonan intensivo, nan aktuashon riba esenario i e ambiente tras di kòrtina. Banda di esaki nan a duna nan impreshon tokante e hurado, e entrega di premio i e presentashonnan despues di e festival. E hóbennan a bini ku sugerensianan balioso tambe pa den futuro sigui mehorá e festival.
Apresio pa dedikashon i talento
Komo muestra di apresio pa nan dedikashon i kontribushon na nos kultura boneriano, e diputadonan a duna kada kantante hòben di tumba un regalito. Ku esaki nan kier a ekspresá nan gratitut pa e entusiasmo i kompromiso ku e hóbennan a demostrá.
Evaluashon pa temporada di karnaval 2025
Timoteo Silberie, hefe suplente di e departamentu di Kultura (SKAL), tambe tabata presente na e enkuentro. El a hasi anotashon di e kòmbersashon i lo inkluí esaki den e evaluashon kompleto di e temporada di karnaval 2025.
Gradisimentu na guianan i mayornan
Un danki spesial ta bai pa señor Melaan i tur mayor ku a sostené e kantantenan hóben di tumba. Nan dedikashon i enbolbimentu a kontribuí na un festival eksitoso i un eksperensia balioso pa e hóbennan.
