Diputado Peter Silberie ta kontentu ku atletanan yòn ku ta partisipá na CONSUDE a mehorá nan tempu deportivo individual. E nivel haltu di kompetensia den deporte individual ta motivá atletanan lokal i ta permití nan mehorá nan tempu personal. E diputado ta na Paraguay pa e weganan, kaminda e ta sigui kompetensia di e atletanan ku masha atenshon.
Seis aña pasá, Silberie tabata enkabesá e organisashon deportivo INDEBON. Na 2019, el a asistí na weganan di CONSUDE na Paraguay. "E nivel di e Weganan ta hopi haltu. Partisipantenan ku ke gana mester prepará hopi bon di antemano. E preparashonnan pa partisipá na CONSUDE ta kuminsá den eksterior na yanüari, ku kuater seshon di entrenamentu pa siman," e diputado a splika.
“Ta bon tambe si nos atletanan kuminsá prepará na un edat mas yòn. Si nan kompetí den e weganan pa di promé biaha i pèrdè, no ta nada serio. Nan por prepará pa e siguiente biaha ku nan kompetí. E preparashon ei ta mas duru ku bo ta kere, pero e ta nesesario.”
E aña akí atletanan ku limitashon ta partisipando pa di promé biaha na e weganan. Silberie ta aploudí esaki. “Mi ta kere ku ta bon ku atleta yòn ku desabilidat por partisipá tambe. E ta un impulso pa nan. E ta mustra ku apesar di nan desabilidat, nan tin chèns di gana un kompetensia. Tur atleta ta konta.”
