Diputado Anjelica Cicilia tabatin resientemente un enkuentro pa sera konosí Bonaire Nature Platform. E kombersashon a tuma lugá den un ambiente positivo i konstruktivo.
Durante e enkuentro a papia kon e organisashonnan i entidat Públiko Boneiru por koperá mihó pa protehá naturalesa di Boneiru – tantu na e isla mes, komo na Den Haag i otro plataforma relevante. “Nos ta kere ku ta importante pa forma un aliansa en frente di trahadó di maneho, pa nos por realisá nos metanan komun,” asina diputado Cicilia a bisa.
Bonaire Nature Platform ta un kolaborashon entre vários organisashon di naturalesa, kada un ku nan mes ekspertisio. E organisashonnan ku ta partisipá ta entre otro BonBèrdè, CARIBSS, Coastal Dynamics, Echo, Internos, the Mangrove Maniacs, Reef Renewal Foundation Bonaire, Sea Turtle Conservation Bonaire, STINAPA, Tera Barra i WWF-NL.
E plataforma a stipulá sinku prioridat pa e próksimo añanan: protekshon i restorashon di ref di koral, mantenshon di regla ku tin aber ku naturalesa, atendé ku bestia ku ta kana liber komiendo yerba, maneho duradero di awa di áwaseru i maneho efektivo di awa sushi.
Diputado Cicilia ta ansioso pa koperashon mas estrecho ku e plataforma i ta suprayá interes di un esfuerso konhunto pa protekshon di Boneiru su naturalesa úniko.
